Dialuna, Minister di Husticia y Asuntonan Social, Sr. Rocco Tjon a aproba e oferta cu comision multidisciplinario a scoge pa e compra di portofoon nobo pa henter Cuerpo Policial di Aruba.
Segun un comunicado di gobierno, tin hopi inversion tumando luga pa cu Cuerpo Policial, cu ta toca e parti di infrastructura, material pero tambe e parti organisatorio.
Ta asina cu ya pa algun luna tin un ekipo multidisciplinario trahando pa yega na portofoon nobo pa Cuerpo Policial. Esaki ta un di e hermentnan di mas importante pa e Agente Policial por eherce su trabao optimalmente. Di e forma aki, e por garantisa su propio seguridad y e integridad di Cuerpo Policial aun mas.
Pa prome biaha cada Agente Policial lo haya su propio portofoon, y di e forma aki, manera a indica, ta bay eleva siguridad pa e Agentenan, pero na mes momento ta trata na evita kiebronan di integridad pa loke ta acceso na informacion. Pa e motibo ey tambe a percura pa e “encryption” di mas sofistica.
Banda di esaki, mester remarca cu tur e autonan nobo pa Cuerpo Policial, cual por cierto a yega Aruba caba, tambe lo wordo ekipa cu “mobilofoons”. Di e forma aki nos lo sigui inverti den nos departamentonan hudicial e lunanan nos dilanti, segun e comuncado.
