Minister di Enseñansa ta admiti cu e lista di scolnan pa drecha ta relativamente largo. E suma total pa cubri tur e renobacionnan cu ta necesario ta segun e mandatario obviamente un suma cu no ta disponibel.

Segun minister di Enseñansa Michelle Hooyboer – Winklaar, ta asina cu di berdad e lista di scolnan cu ta wardando pa renobacion ta relativamente largo y nan tin algun cu ta riba lista pa basta tempo. Esaki ta conta pa renobacion general como tambe esunnan cu ta haci falta di varios aspecto di mantencion y reparacionnan menor. E inversion di 280 miyon florin necesario pa cubri tur renobacion no ta disponibel den presupuesto actual of fondonan di por ehempel FDA (Fondo Desaroyo Aruba). “Awo nos ta wak un situacion unda nos tin cu genera un fondo cu ta bay haci esaki.” Ministerio di Enseñansa a propone den pasado pa por haci esaki via un PPP, esta un Public-Private Partnership. Manera ta e caso cu hospital y Green Corridor.  E mandatario ta bisa si cu tin un diferencia cu locual nan kier: “E no ta mesun cos cu PPP cu a ta haciendo, den e sentido cu e scolnan lo no ta bira propiedad di un tercer persona. Pero den e caso akinan nos ta purbando di haci un analisis financiero pa wak si esaki por cubri gastonan di un algemeen PPP.”

Peticion pa FDA
Akinan e mandatario ta referi na por ehempel gastonan edificionan di huur temporario cu ta uzando awo pa scolnan cu ta ubica otro camindanan, placa di mantencion y otro potnan. Si acumula tur cos hunto y haci esaki mas “budget neutral” posibel cu lo bay probablemente na un consorsium cu lo ta drecha e scolnan y encarga cu parti di mantencion structuralmente. “Nos ta purbando di wak si nos por haci un peticion na e fondonan cu a resta di FDA. E fondonan pues cu a wordo destina pa otro camindanan cu proyectonan cu no a bay door. Nos a manda un carta pidiendo esaki na Hulanda pa wak si nos por haya algun di e fondonan ey pa cambia e destino y pone den un fondo cu lo cubri e gastonan ey.”

Trayectorio largo
“Esaki ta un trayectorio basta largo pa motibo cu tin varios rekisitonan.  Pa haci un analisis profundo tambe ta rekeri fondonan pa por huur in e experticio eynan. Tur esey ta cosnan cu nos ta trahando riba dje pero e ta keda un reto y suma cu no ta cambia”, minister Hooyboer-Winklaar ta splica Bon Dia Aruba. E mandatario tambe a comparti cu actualmente tin varios renobacion andando. E scolnan aki entre otro ta Rosa College, Imelda Kleuterschool, Colegio San Nicolas, y St. Augustinus cu tambe ta den su fase final. A caba di completa parti di Arco Iris Kleuterschool y tin varios otro proyectonan di ponemento di asfalt cu ta andando na mas o menos 10 scol. Scolnan cu ta den proceso pa wordo analisa awo ta entre otro SPO (Scol Practico pa Ofishi) cu ta bay haya nan mesun edificio pariba di brug.  Frere Bonifacius y Reina Beatrix tambe ta actualmente den proceso di analisis na DOW. St. Aloysius na Noord ta un scol cu Bon Dia Aruba mes a bishita algun biaha caba cu ta bogando pa renobacion pa algun aña. Segun e minister, e scol aki mes ta riba un lista di urgencia hunto cu cinco otro scol. Pa renobacion di e seis scolnan aki ta premira un inversion di mas o menos 30 miyon florin.

Maneho
Segun Minister Michelle Hooyboer-Winklaar, e maneho pa locual ta renobacion di scolnan ta wordo parti. Pues e ta wordo parti entre renobacionnan mas grandi cu cosnan menor manera reparacion electrico, reparacion di bentana y mas. E mandatario ta splica Bon Dia Aruba cu: “Ora cu tin un scol cu tin porta kibra of  cosnan cu mester bay drecha den cura , tin un proceso pa esaki. Si ta un scol cu ta di Dienst Publieke Scholen (DPS) , nos ta pone bou di presupuesto di DPS y nan ta tuma contacto cu DOW.” Si ta un scol cu ta cay bou di Skoa un otro organisacion, e procedura ta mesun cos fuera di e fuente di e fondonan. E otro scolnan aki ta ricibi fondonan for di gobierno unda cu DOW ta busca diferente oferta pa nan. Esaki ta e maneho pa mantencion menor. Pa loke ta trata mantencion mas grandi di scolnan, Minister Winklaar ta bisa cu tin scolnan cu tin entre 40 pa 60 aña of mas cu ta den e mesun estado. “A pesar cu nos a inverti den e ultimo añanan mas o menos 27 miyon florin den renobacion di varios scol, e lista pa locual ta mantencion mas grandi ta keda largo.”