Ayera mainta durante un conferencia di prensa, Minister di Husticia y Asuntonan Social, Sr. Rocco Tjon a anuncia inicio di renobacion di e post di Brandweer na San Nicolas.
Minister Tjon a splica cu e proyecto aki ta un inversion di 1.6 miyon florin pa asina percura cu por renoba e warda por completo. Lo tene cuenta cu e parti di electricidad, e parti di sistema avansa di camara pa asina por garantisa seguridad di tur e empleadonan. “Practicamente e ta bay bira un Brandweer post completamente nobo”, el a indica.
Tjon a gradici DOW cu na october aña pasa a percura pa destaho di e proyecto aki, cual a wordo gana door di Albo Aruba NV. Segun Tjon a menciona, e renobacion completo ta bay dura 120 dia, cu ta e cantidad di dianan cu tin poni den e contract di renobacion.
El a subraya cu su Ministerio a cuminsa hiba combersacionnan aña pasa cu sindicato di brandweer, SINBA, pero tambe cu management team. A trece diferente punto di preocupacion pa dilanti pa loke ta e parti di material, e parti di circunstancianan di trabao manera e diferente postnan, pero tambe e parti di posicion huridico di tur e personal.
“Mi mester bisa cu cada dos siman tin reunionnan tumando luga di parti di nos Ministerio, hunto cu e sindicato y hunto cu management team, pa asina nos por duna atencion na tur e puntonan aki”, Tjon a agrega.
December ultimo, el a indica, a inverti cinco miyon florin pa adkiri diferente trucknan nobo pa Brandweer. E parti di opleidingen tambe ta haya su atencion y aworaki den luna di april, Tjon a menciona, opleiding ta bay cuminsa pa manschap A, un topico cu tabatin hopi importancia pa e personal. “Di e forma aki nos ta trata di duna atencion na tur e puntonan aki”.
“Mi kier a bisa pabien tambe na sindicato y tambe na management team cu constantemente – y mi mester bisa tambe na un manera positivo, na un manera proactivo tambe – no solamente ta trece e problemanan pa dilanti, pero nan ta trece solucionnan tambe pa dilanti, pa di e forma ey di parti di nos Ministerio nos por percura tambe pa esakinan wordo ehecuta.”
Miembro di prensa a puntra Tjon si den e inversion di 1.6 miyon ta inclui uniform y otro materialnan pa e trahadonan. Na esaki, Tjon a contesta cu ya caba nan a adkiri e pluspakken, full e paña cu e trahadonan tin mester ora nan bay combati candela, y aworaki nan ta en espera pa nan yega.
Pa loke ta e parti di uniform, el a splica cu for di luna pasa caba un carta for di su Ministerio a bay pa tur e diferente director- y comandantenan, Brandweer, Cuerpo Policial, Warda Nos Costa, CEA, tur e departamentonan uniforma pa nan inicia cu full e proceso aki, pa na momento cu presupuesto wordo aproba – cu segun el a indica probablemente lo ta otro luna – por cuminsa adkiri tur e uniformnan tambe pa tur e personal.
Tjon a remarca tambe cu en total a bestel cinco truck, banda di esun cu a yega ultimo, na juni e proximo ta yega y otro aña na januari e siguiente dosnan ta yega. “Manera e dirigentenan di Rosenbauer mes cu tabata presente a splica, e trucknan aki nan no tin nan cla den un showroom, kiermen e ta dura lunas prome cu nan por construi e trucknan aki. Pues p’esey e diferente tempo cu e trucknan aki lo yega Aruba”, el a splica.
Tjon a splica tambe cu mientras cu e post di Brandweer San Nicolas ta den renobacion, e personal no por t’ey den e edificio, mirando e magnitud di e renobacion cu ta bay tuma luga. Management team hunto cu sindicato SINBA a percura pa dos trailer nobo riba tereno di Scol di Polis y for di eynan e empleadonan ta bay opera durante e 120 dianan cu e renobacion tuma luga.
Sr. Davni Roza, presidente sindicato SINBA, tambe tabata presente y otro miembro di prensa a puntra pakico no a busca otro luga mas cerca pa muda temporalmente e post di Brandweer San Nicolas. Sr. Roza a splica cu pa dos siman nan a busca na diferente luga, entre otro ImSan bieu, ImSan nobo, postkantoor, Balashi, FTA, pero e problema tabata cu e edificionan tabata afgekeur, unda e autonan ta para; y unico opcion cu tabatin di parti di Tjon tabata Scol pa Polis. “E ta un bon luga, e ta cera y autonan por keda paden”, el a expresa.
