Un hoben inventor Hulandes ta ampliando su esfuerso di saca plastic flotante for di ocean Pacifico door di bay den riu tambe, uzando un aparato flotante nobo ta trapa sushi prome cu esaki yega lama.
Dropout di universidad, Boyan Slat di 25 aña di edad a funda The Ocean Cleanup pa desaroya y lansa un sistema cu el a inventa tempo e tabatin 18 aña, cu ta trapa desperdicio plastico flotando den ocean.
Diasabra el a revela e proximo stap den su lucha: Un aparato flotante cu energia solar yama ‘Interceptor’, cu ta trapa e plastic for di riu mientras esaki ta flota.
E organisacion di Slat den pasado a ricibi critica pa enfoca unicamente riba desperdicio plastico cu ya caba ta flotando den ocean. Expertonan ta bisa cu 9 miyon ton di desperdicio plastico, incluyendo boter, saco, co’i hunga y otro, ta pasa anualmente pa ocean for di beach, riu, y aroyo, poniendo den peliger bida marino den ocean, incluyendo bayena.
Tres di e mashinnan ya caba a ser manda na Indonesia, Malaysia y Vietnam – y e di cuater ta bayendo Republica Dominicana, el a bisa.
Izham Hashim di gobierno di estado di Selangor na Malaysia tabata presente pa e lansamento, y a bisa cu e ta contento cu e mashin. “Nos ta uzando e pa un luna y mey den e riu y ta bayendo hopi bon, colectando e boter di plastic y tur e desperdicio”, el a bisa.
Slat a bisa cu e ta kere cu mil riu ta responsabel pa alrededor di 80% di plastic bayendo den ocean mundial, y e kier enfoca riba nan den e proximo cinco aña. “No ta bay ta facil, pero imagina si nos logra esaki”, el a bisa na un audiencia di sostenedo entusiasta. “Nos lo por haci nos ocean limpi di berdad.”
Slat a uza e revelacion di e mashin pa apela pa mas sosten for di paisnan comprometi pa haci nan riunan limpi, y na negoshinan prepara pa inyecta fondo pa yuda cu e operacion di e aparatonan.
E aparato ta diseña pa para den riu y tin un nanishi cu un forma pa evita desperdicio flotante mas grandi, manera palo. E interceptornan ta traha door di guia plastic den un apertura, un belt cu ta hiba e desperdicio den e barica di e mashin unda ta bent’e den un bari. E interceptor ta manda un mensahe di texto na e operadornan local pa bin y saca e sushi ora e ta yen.
Slat a demostra con e ta traha tirando centenares di pato geel di plastic den awa na e evento di lansamento na haf di Rotterdam. E interceptor a gara casi tur di nan.
Actualmente e mashin ta costa como 700mil euro, pero Slat a bisa cu e costo probablemente lo baha mientras produccion ta aumenta.
