Siman pasa gobernacion tabata manera un cas di galiña unda un boa a cay aden. Talvez e cos a parce di calma un poco, pero sin duda algun e acontecimentonan lo obliga e partido den gobierno pa reconsidera su plannan pa campaña. Sali na e momento aki den publicidad y drenta bario cu e mensahe di ‘exito y alegria’ pa tur loke, segun nan mes, a logra den e ultimo dos periodo di gobernacion, ta parce un tarea imposible. Rechaso o un actitud ambivalente por ta reaccion di gran parti di esnan cu nan confronta.

Como agravante por añadi cu e investigacion no ta algo cu ta bay keda cla den poco tempo y lo ta cerca di fecha di eleccion o hasta despues di esaki, prome cu tin claridad riba e pasonan hudicial cu lo sigui. Esaki lo trece decision fastioso cune. Por ehemplo, si na momento di entrega lista, no tin un claridad riba e situacion di e ministro marca como sospechoso, anto mester dicidi si ta pone su nomber como candidato, o mester pidie ‘por fabor’ pa hala un banda. Si dicidi pa core e riesgo cu den e recta final pa eleccion su persona keda yama pa aparece dilanti hues, esey lo ta un golpi grandi pa e partido den campaña. Si prome cu dia di eleccion bin un claridad cu no ta bay persigui su persona penalmente, no ta keda mucho tempo mas pa convence e ‘swing vote’ cu e partido a mantene credibilidad. E riesgo ta keda, sin embargo, cu no lo tin un decision di e autoridadnan hudicial ainda pa dia di eleccion. E riesgo pa partido ta anto cu ta campaña ‘schouder cu schouder’ cu un persona cu poco tempo despues tin cu duna cuenta na hues. Y no pasobra el a pasa den luz cora, pero pa delito di gravedad cu tin di haci directamente cu e funcion publico cu e tin.

Ademas tur esaki tin di haci cu e posible scenario cu e investigacion actual por tin consecuencia pa otro ministerio. Y pakico esaki ta un opcion real? Cu bastante asombro nos por a mira cu hopi medio di comunicacion ta papia di otorgamento di ‘permiso di trabao’. Esey ta algo cu no ta existi, nos no conoce un permiso otorga pa ministerio encarga cu labor. Loke nos tin ta un permiso di residencia temporal (“verblijfsvergunning”), cu si of no ta inclui e permiso pa traha, cerca determinado dunador di trabao, den cierto funcion. Esaki ta implica cu, si ta berdad cu e ministro y/o e hendenan den su alrededor a haci nan mes culpable di corupcion, nan no a ‘bende’ un permiso. Pa e permiso mester bay na DIMAS, o na despacho di e ministro encarga cu estranheria. Ta inimaginable cu e investigacion por lo tanto lo limita su mes na un ministerio so. Si e extension di e investigacion bira conoci entre awe y dia di eleccion, e panorama electoral ta cambia drasticamente pa e partido den gobierno. Debilita caba cu salida di un ministro encarga cu turismo, salida anuncia di otro ministro (enseñansa), varios parlamentario o candidato riba lista anterior, ta crea practicamente un ‘mission impossible’ pa e talentonan di orador di e actual lider.

Con bashi e discursonan di custumber, yena cu palabra manera ‘green’, desaroyo sostenible, economia duradero’ mester ta zona di awor en adelante. Y mas cu tur cos pasobra a surgi un ambiente den cual e aspectonan negativo di e maneho hiba ta resalta. No ta trata di e situacion di debe solamente, sino tambe di e fracaso pa logra algo sustancial riba tereno di energia renovable, por ehemplo. E molinanan tabatey caba na 2009, WEB keto bay ta usa fuel oil na lugar di gas, no a crea un programa di estimulo pa energia solar priva. Realmente e parke solar na aeropuerto ta e unico muestra visible di un maneho di energia renovable, cu mester a sirbi como punta di lansa di e gobierno aki. Por lo demas no por papia di un maneho drechi di conservacion di flora, fauna y paisahe, cu e destruccion di Rooi Frances pa corona obra. Aunke ta culpa ignorancia di trahador di e destruccion, e ta simbolisa e caos organisativo den gobernacion na un manera ehemplar.

Tur e contratiempo aki pa e partido den gobierno sin embargo no por significa cu e partidonan den oposicion por relaha y sinta warda dia di eleccion yega. Esnan cu a goberna caba tambe tin nan pasado. Tur lo mester tin mas cu un par di frase di propaganda manera: “‘nos si ta bay percura pa bon gobernacion.” Esaki simplemente no ta suficiente pa gana voto. Ta necesario analisa e problemanan profundo di falta di control den e aparato gubernamental y e falta di etica den e circulonan halto di gobernacion. E mero hecho cu ta gara un mandatario cu trahador ilegal den su cas y e mes ni su coleganan tin e decencia basico di baha o exigi cu e ta baha, ta papia pa su mes. E pregunta ta cuanto empleada el a usa den e añanan cu e ta sinta.