Inundacion na Palm Beach a causa casi mey miyon florin na daño

Varios negoshi como tambe hogarnan a sufri di bastante daño despues di e awasero torencial di november aña pasa. E gas stacion na Palm Beach su so a sufri casi 300.000 florin na daño sin laga afo otro negoshinan den e area cu te dia di awe no por habri.

Palm Beach tabata un di e areanan cu tabata completamente bou awa despues di un awasero torencial cu a asota Aruba un diadomingo madruga pa mainta aña pasa.
Esaki tabata un awasero inespera cu a causa hopi daño den hogarnan den e area como tambe negoshinan. Varios negoshi a perde hopi ekipo caro manera freezer y restaurantnan den e area mester a benta hopi cuminda afo.

Director na Valero Palm Beach –  cu awor ta bay bira Citgo Palm Beach, Bruce Ponson ta bisa:  “E daño direct cerca nos lo mester ta entre 250.000 cu 300.000 florin. Esaki ta inclui limpiesa, perdida di benta di dianan cu nos mester a cera,  loke nos mester a schrijf af den mercancia, kantoor, computer. Pues daño completo.”  Segun sr. Ponson, den balor e ta un tiki menos pasobra hopi di e cosnan nan tabata ‘schrijf af’ caba durante e ultimo añanan. “Cu esaki nos ta den contacto cu seguro pa wak con leu nos por yega na un compensacion parcial por lo menos pa e negoshi por recupera e dañonan ey. Nos tabata tin suerte compara cu nos otro bisiñanan cu si a perde hopi mas.”

No ta prome biaha
Na aña 2006 nan a yega di pasa den un inundacion.  Despues di un renobacion na 2007, nan a tene consideracion cu si mester inunda atrobe nan tanki y pompnan mester ta sigur.  “Esey tabata nos bentaha grandi cu tur nos ekipo tabata bon tapa cu e no a afecta e diesel ni e gasolin.  E tienda si tabata tin daño anto aworaki nos ta percurando pa e pidanan mas abou no tin hopi mercancia”,  sr. Ponson ta splica.

Renobacion
Un otro bisiña di e gas stacion cu tabata hopi afecta ta Khali Laundry cu mester a keda cera pa tres siman despues di e inundacion. Gerencia di Khali Laundry ta bisa cu te ainda nan ta den proceso di renobacion , algun mashin ta traha cu dificultad y otro nan no ta traha mes. “Nos no tabata tin seguro, kiermen tur cos a bay den nos mes cual di berdad a dal nos basta duro.” Bon Dia Aruba a purba tuma contacto cu otro tiendanan den bisindario, manera Subway y Nature’s Discount pa un reaccion pa locual ta nan daño pero no a logra. E localidadnan aki ainda ta cera bou trabou di renobacion. Otro negoshinan na otro banda di e gas stacion manera Gari Wasabi y nan bisiñanan tambe a sufri hopi daño y mester a keda basta siman cera pa renobacion.

Infrastructura
Varios ciudadano ta comenta cu e situacion cu infrastructura na Aruba no ta algo nobo. Esaki ta un problema cu ta andando pa decadanan y hopi hende ta cansa cu stagnacion di awa ta keda ripiti na e mesun areanan y awo te hasta na areanan nobo. Aruba no sa haya awasero torencial di e nivel aki tur aña tampoco anto esaki tabata un sorpresa.

Bon Dia Aruba a puntra prome minister aña pasa kico ta e plan pa por cuminsa soluciona e problema aki pa nos no mester ta papiando di dje ainda aki 10 pa 15 aña, cual el a contesta: “E ta hopi fastioso. E ta un situacion unda continuamente bo tin cu traha infrastructura nobo pasobra ta bin mas cas, mas edificio y unda cu bin un cas of edificio, e ta laga menos luga pa awa. ”

E mandatario Mike Eman a sigui bisa cu: “Esaki ta haci cu continuamente mester wak con mester crea infrastructura nobo pa hiba e awa mas lihe posibel na e punto mas abao cu ta lama. Den e caso aki nos ta mira dos acercamento: pa crea canalnan adicional pa e awa por yega mas lihe anto kita e estorbonan tambe paso tin biaha awa ta wordo stroba door di muraya grandi.” E awasero cu a cay tabata uno cu nos no a wak den hopi tempo y segun minister di Infrastructura,  ni con bon bo infrastructura ta bo no por verwerk e awa ey. Sin embargo despues di algun ora e awa a bay toch. “Esey kiermen cu e sistema ta funciona pasobra antes ora algo sosode, ta dos tres dia e awa ta keda para, e mandatario aki, Benny Sevinger ta bisa. Gobierno kier sigui adapta riba e sistema cu nan tin caba y pa esey, conhuntamente cu DOW, ingenieronan ta trahando riba un plan caba tanto pa Palm Beach como Madiki.

1 miyon pa duiker ‘chikito’
Aña pasa Bon Dia Aruba a haya un invitacion di PalmAruba Condos cual ta dilanti di e gas stacion na Palm Beach pa wak e duiker cu nan a traha. Esaki tabata un inversion cu e compania mester a haci di 1 miyon florin pa construi un duiker – cumpliendo cu tur exigencia di DOW – pa yuda cu e fluho di awa. Antes tabata tin un rooi cu tabata pasa eynan. Ora a construi e edificio aki nan a haya permiso pa construi algun meter mas halto. Esaki varios comerciante como tambe habitante den e area a señala cu tabata e motibo pakico e awa a keda pega eynan.

Segun Jossy Kock di departamento di DOW: ” Nos a haci un analisis di esaki caba y ta mustra cu locual nan a construi (e duiker) ta chikito pa locual e fluho di awa ta.” Sr. Kock ta splica cu lo tin cu bay sinta cu PalmAruba pa wak con nan por yega na otro pa asina amplia esaki y yuda alivia e situacion cu tin actualmente eynan ora cu hopi awa cay.