Durante un conferencia di prensa diahuebs pasa di Gabinete Wever-Croes tocante e situacion di abuso sexual di mucha na Aruba, minister di Enseñansa, Ciencia y Desaroyo Sostenibel, hunto cu sra. Carmen Herrera- director di Fundacion Proteatro Aruba, a splica cu nan a cuminsa duna hermentnan pa e profesionalnan por uza pa duna terapia pa detecta e fenomeno di abuso sexual.
Minister Rudy Lampe a expresa cu e tema aki hopi biaha ta keda un tema scondi y tabu den comunidad. Hende no ta papia di dje, pero pa via di pintura, nan por saca afo ora cu un mucha of hoben, y te hasta adulto, a ser abusa sexualmente.
Di mesun manera, el a comenta cu na aña 2018-2019, nan a implementa e Proyecto Prevencion di Abuso di Mucha, pa motibo cu unabes cu e acto a tuma luga, e daño ta haci pa e resto di e bida di e mucha, y p’esey mas importante ta e prevencion, duna poder na e mucha, duna e instrumentonan pa asina e mucha por bisa ‘No’ y e instrumentonan den cualkier momento kico nan mester haci of con mester actua ora di enfrenta un caso asina, prome cu e acto lo tuma luga.
Den aña escolar aki, Lampe a expresa cu nan a ofrece un training di tayer pa e maestronan y asina nan por implementa den klasnan, y for di october pa november, nan a cuminsa e proyecto y ta bay continua den ultimo trimester den diferente scolnan.
Lampe a informa cu nan a cuminsa cu scolnan publico cu ta cay abou di DPS, y nan ta espera cu den aña escolar nobo, lo sigui implementa na tur scol di Aruba.
Asina mes, Carmen Herrera, director di Fundacion Proteatro Aruba, e persona cu a tuma e iniciativa aki cu apoyo di Cede Aruba y Fundacion Mochila, a cuminsa haci e trabou pa imprimi tur e materialnan y ehecuta un obra di teatro cu ta siña y duna e instrumentonan necesario pa e muchanan, y hunto cu Ministerio di Enseñansa, a implementa esey.
Herrera a bisa cu desde aña 1986, el a cuminsa traha riba un obra di teatro pa siña e muchanan y duna e hermentnan di con nan por preveni abuso sexual di mucha, y di mesun manera el a crea un buki y finalmente a crea e metodo, cu diferente lesnan basa riba cantica, video, entre otro. E metodo aki ta esun cu awor e scolnan a haya pa traha.
“Nos tin cu siña e muchanan ki nan por haci ora un hende a acerca nan di un manera cu no ta gusta”, Herrera a afirma.
El a splica cu nan ta traha cu diferente disciplina, ‘por ehempel den un les, nan ta traha na mesun trahe di baño, pero e meta final ta cu e trahe di baño ta tapa su parti intimo, nan ta siña e parti ey di curpa unda cu un hende no mag di bin”, el a bisa.
Tambe Herrera a sigura cu realmente ta necesario pa duna e muchanan hermentnan pa e problema aki no pasa, pa por lanta un comunidad sano, y tur hende mester ta riba dje.
