Den colaboracion cu FPNC Aruba, Ministerio di Asuntonan di Adulto Mayor ta introduci un proyecto piloto sumamente importante. E proyecto piloto aki, cu lo tuma luga over di un periodo di 4 luna, ta encera entrega di cuminda cayente na un grupo vulnerabel di 65-plussers cu ta registra na FPNC, cu no tin suficiente entrada pa por sigura un cuminda diario pa nan mes.
“Nos ta consciente cu tin un crecemento den e grupo di adulto mayor cu no tin un entrada fiho of tin un entrada limita cu ta causa cu nan ta sufri di inseguridad alimentario y malnutricion. Den colaboracion cu FPNC e proyecto piloto aki lo yuda pa eleva nan calidad di bida,” Minister Arends a duna di conoce. “Esaki no ta solamente pa nan salud fisico, pero alabes lo haci uso di e momento di entrega di cuminda pa kibra e isolacion social door di combersa y comparti un momento ameno cu e adulto mayor. Pa nos e iniciativa aki ta mas cu djis un entrega di cuminda, e ta un oportunidad pa nos comunidad realisa cu nos adultonan mayor mester di cada un di nos y asina stimula participacion civico pa cu esnan den necesidad.”
E proyecto lo start cu entrega nan diario di cuminda cayente durante siman, y adicionalmente, lo inclui dos bes pa siman un pakete di desayuno. Ta premira cu e proyecto lo yuda por lo menos 50 adulto mayor rond di Aruba den e fase inicial, cu plan pa amplia e proyecto.
Minister Arends ta enfatisa cu cuido di nos adultonan mayor ta di suma importancia pa nos comunidad. Colaboracionnan cu sosten y aporte di instancianan social por yuda coregi problemanan di insiguridad alimentario entre esnan cu ta mas vulnerabel den nos comunidad, specialmente nos adultonan mayor.
Ministerio di Asuntonan di Adultonan Mayor hunto cu FPNC lo traha man den man cu partnernan manera Voedselbank pa coordinacion, restaurantnan pa preparacion di cuminda pa asina cumpli cu e necesidadnan di cada participante den forma mas optimal posibel. Minister Arends ta agrega cu lo monitor e proyecto piloto aki di cerca y evalua con por stimula mas participacion pa di e forma aki por, no solamente sigura e continuacion di e proyecto a largo plazo, pero tambe subi e cantidad di adulto mayor vulnerabel cu por wordo asisti, garantisando asina cu nos adultonan mayor por keda biba mas largo den nan mesun cas, cu ta locual hopi di nan ta desea.
Bon Dia Aruba a tuma contacto cu director di Fundacion Pa Nos Comunidad pa pidi comentario tocante e proyecto. E fundacion a indica cu e proyecto no a cuminsa ainda, pero asina cu e cuminsa, nan lo por duna mas informacion.
