Dialuna ultimo, Minister dr. Armando Lampe a sigui cu entrega di diferente di e digiboardnan na diferente scolnan publico, esaki despues di ya a entrega na Scol Primario Kudawecha y Scol Basico Washington. Dialuna a toca turno na Prinses Amalia Basisschool, Scol Prinses Beatrix (su dependance na YMCA Dakota) y na Colegio Conrado Coronel.
Algo peculiar riba e dia aki, ta cu a constata algun contratiempo den e logistica pa cu e entrega di e digiboardnan. E transporte tabata algo cu no por a resolve den un corto tempo. Pero no a para keto y a acerca sector priva y sin ningun duda, ora di acerca propietario di Italo Arubano, Gregory Tromp, el a ofrece su auto di compania pa yuda cu transporte, hasta el a pone algun personal disponibel pa yuda carga y descarga.
Sorpresa tabata ora cu e transporte a yega, e propietario su mes tambe a bin duna un man, cual ta algo hopi di aprecia, segun un comunicado di gobierno.
Lampe a keda sumamente contento cu sector priva ta saca un man, pa yuda cu nos enseñanza. “E ta algo sigur di aplaudi y spera cu mas otro companianan den sector priva, por yuda, den un manera casi espontaneo manera tabata e caso cu e compania Italo Arubano a haci. Un danki y un pabien na e scolnan cu a caba di ricibi nan digiboardnan y sigur un danki na Italo Arubano, cu tambe a aporta na enseñanza, na unda cu cualkier aporte na nos enseñanza, ta un aporte na prosperidad di nos pais.”
