Intervencion Europeo… Como medio di ultimo resorte…?

Promer ministro di British Virgin Islands cera na Merca pa envolvimento den narcotrafico y labamento di placa. Algo cu ta parce totalmente abnormal, pero en realidad esey ta asina? Na Aruba mes nos ta pasando den e berguenza di tres ex-ministro cu mester responde dilanti mesa berde, pero den nos region e influencia continuo di criminalidad internacional, specificamente liga na narcotrafico y labamento di e beneficionan di e negoshi, no a pasa sin laga su marca. Y e consecuencianan pa gobernacion no ta limita.

Asina na 2009 Gran Bretaña a interveni den gobernacion di Islanan Turks & Caicos, poniendo un banda parlamento y gobierno, cu tur poder temporalmente den man di gobernador. A dura varios aña, te fin di 2014, promer cu gobierno Britanico a considera cu tabatin un situacion mehora cu a permiti un retorno gradual na un parlamento y gobierno local funcionando atrobe. E motibo pa e intervencion na 2009, riba e islanan di actualmente 45.000 habitante, tabata cu e promer ministro di e pais tabata envolvi den corupcion, entre otro cu tereno di propiedad publico. E estilo di bida di e promer ministro a conduci tambe na un deficit financiero structural, cu mester a coregi cu un inyeccion di US$ 417 miyon, cu lo mester a hiba na su turno na un surplus den e añanan despues. Esey ta zona conoci? Tambe gobierno Britanico a dicidi cu tabata necesario reforma gobernacion di e islanan, concentrando riba educacion, salud, infrastructura y economia. Esey tambe ta zona conoci?

Cada biaha cu tin un intervencion di e antiguo podernan colonial den nan antiguo propiedadnan cu a haya gobernacion propio despues di Segunda Guera Mundial, tin lamento y critica di un banda, y di otro banda ta tuma e mesun medidanan considera necesario pa coregi rumbo di e islanan. Y basicamente e diferencia entre e medidanan tuma den e anterior teritorionan Britanico cu ainda tin lazo cu e pais madre, y esunnan Hulandes no ta asina grandi. Den e caso di islanan Hulandes nos a registra dos intervencion grandi na Sint Maarten, intervencion algun aña atras na Sint Eustatius, y intervencion menos radical na Aruba na 2014 y e añanan despues, pa interveni den e rumbo financiero negativo causa pa e maneho iresponsable principalmente di e gobierno democrata cristian di 2009 – 2017.

Den e caso mas reciente, di British Virgin Islands, atrobe ta mira e mesun fenomeno tambe di e poder local, cu ta pretende cu e promer ministro por tabata malo, pero cu e pais por sigui maneha su propio asunto, mientras e supervisor Britanico ta pensa diferente. Esaki ta trece cune un pregunta interesante: si un promer ministro di un pais ta meti den criminalidad di nivel, ta logico pa pensa cu e tabata un ‘llanero solitario”? Cu ta suficiente pa laga husticia atende su caso y por lo demas laga e pais ‘na paz’? O ta asina cu mester supone cu un persona asina nunca por a actua sin e apoyo di un grupo di hende di confianza cu tabata percura pa cubri tur aspecto di e negoshi? En todo caso na e paisnan supervisor e tendencia ta pa pensa cu e tipo di criminalidad aki ta señal di algo mas profundo, a base di e hecho cu pa mas hende e tipo di acto criminal aki ta considera ‘normal’ den gobernacion. Ta pesey cu ta insisti den reforma di gobernacion, cu hopi biaha ta haya un bachi di reforma general, pero cu sigur tambe tin su aspecto di reforma den e aparato pa por anda mihor preventivamente cu situacion di criminalidad den gobernacion.

E siguiente pregunta ta, bolbiendo na nos isla, con nos mester mira e reformanan cu tin programa pa e proximo añanan. Pa motibo di e crisis di Covid-19 e asunto a haya un toque mas financiero, y reforma pa preveni un caida economico asina pisa manera tabata e caso na 2020. Pero cu esey no a atende e asunto, cu ora bo tin tres ministro, cu ta ser hiba corte pa no solamente participa den corupcion, sino ademas dirigi un organisacion criminal, lo mester supone cu esaki ta señal di organisacion gubernamental deteriora, cu ta por lo menos tolera, y den e caso mas grave ta hasta stimula criminalidad den e aparato? Y si tin sikiera un posibilidad cu esaki ta e caso, kico ta haciendo concretamente pa preveni esaki? Aki nos no ta papiando na promer lugar di e mehoracion cu mester tuma lugar den e aparato hudicial, aunke ta logico cu mester drecha loke ta necesario. Sin embargo, husticia semper ta interveni despues ora e actonan criminal ta cometi caba. E aspecto cu nos no ta mira cubri ta kico ta haci den e aparato gubernamental den su totalidad pa preveni. Esaki ta un di e asuntonan cu nos no a mira tampoco den e reciente rapport di NIS Aruba. No a realmente trata e problema grandi di e no existencia di control interno debido, por lo menos y sigur den tur e trayectonan di permiso, loke ta keda duna oportunidad na esnan sin moralidad, di abao te na halto.

Nos mester puntra nos mes, con prepara nos ta pa atrobe ta un di e islanan den Caribe unda ta necesario un intervencion di un poder Europeo. Yora cu nan ta neo-colonialista no ta yuda, si nos mes no ta dispuesto di drecha e cosnan aki. Nos mes por…toch?