Practicamente a bira un custumber cu tur luna coriente ta bay na algun of varios parti di Aruba. E siman aki, riba dos diferente dia, na dos diferente districto coriente a bay lagando ciudadanonan sin coriente durante temporada di calor.
Diahuebs marduga residente di a area di Lagoville San Nicolas a keda sin coriente pa motibo di problema cu distribucion di coriente den un casita di coriente na Savaneta.
E interupcion aki a cuminsa despues di 12or di marduga y segun ELMAR NV a informa a traves di pagina di Facebook, e interupcion a cuminsa riba un kabel subteraneo cu a afecta e casita di coriente. E tecniconan di ELMAR a megger e kabel bao di tera pa asina por a solucion e interupcion di servicio. Pa 1:58 di marduga tur cliente tabatin servicio di coriente back.
Ayera mainta otro caso di interupcion di coriente a bolbe presenta. E biaha aki tabata den e area di Ponton y bisindario.
ELMAR a informa pa 6:13 di mainta cu nan ta confrontando un problema den e distribucion di coriente di area. E problema cu a ocasiona e interupcion di coriente tabata un defecto riba un componente di coriente den un casita di coriente cu ta suministra electricidad pa e area aki.
Pa 8:22 di mainta ELMAR a informa cu suministro di coriente a wordo reestableci den e area di Tanki Flip, mientras tabata sigui cu trabaonan di reparacion den e casita di coriente. Pa 10:14 di mainta e area di Ponton a haya mientras trabaonan tabata continua.
Pa 1:14 di atardi ELMAR a informa cu e trabaonan di reparacion a keda cla y cu tabata trahando pa reconecta e casita di coriente back riba e grid di coriente pa reestablece servicio di coriente completo, y pa 1:50 di atardi tur area afecta tabatin servicio di coriente atrobe.
Desde comienso di e aña aki e interupcionnan di coriente a aumenta. Mirando e seriedad di e situacion, expertonan di Washington di compania MPR tabata presente na Aruba pa haci un investigacion riba e situacion di interupcionnan di coriente na ELMAR.
Durante e presentacion di e resultadonan di e investigacion, e expertonan di MPR a resalta cu e fayo di ekipo ta e riesgo mas grandi riesgo cu nan ta mira na e isla pa e interupcionnan y e suministro confiabel di electricidad pa e ciudadanonan.
Nan a remarca cu e realidad ta cu e confiabilidad di e red di electricidad no a deteriora di un dia pa otro y cu lo tuma tempo pa kibra esaki.
E resultado di e investigacion aki ta indica cu e situacion ta grave y mester cuminsa traha riba e solucion pronto, pero lamentablemente, pa motibo di diferente factor, ta bay tin retraso y pues ciudadanonan lo sigui experiencia e interupcionnan di coriente pa un tempo mas.
