Interupcionnan di coriente por continua: Segun expertonan di MPR, no ta bay tin cambionan rapido den e red di electricidad ainda

Diaranson ultimo expertonan Mericano di e compania MPR a presenta e resultado di nan investigacion, hunto cu nan recomendacionnan, pa loke ta e situacion di red di coriente di ELMAR NV. E interupcionnan di coriente cu a tuma luga frecuentemente den e ultimo simannan, y cu ta sigui tuma luga, ta preocupante y a pesar di esfuersonan pa soluciona problemanan, e solucion no lo bin rapidamente.

Brian Curran, experto di MPR, contestando e pregunta di un miembro di prensa tocante si tin un timeline pa ki tempo lo tin solucion pa e problemanan y si e interupcionnan di coriente lo continua. Curran a splica cu e problema principal di ELMAR NV ta relaciona cu e falta di mantenemento cu no a ser realisa durante hopi aña. El a indica cu awor ELMAR a identifica e problema y nan ta trata pa corigi esaki.

Na esaki el a agrega cu desafortunadamente, no ta bay tin un cambio rapido den e proximo simannan, pues no lo mira un mehoracion inmediato den e confiabilidad di e red di electricidad.

Curran a remarca cu e realidad ta cu e confiabilidad di e red di electricidad no a deteriora di un dia pa otro y cu lo tuma tempo pa kibra esaki. El a resalta cu for di nan punto di bista ELMAR ta haciendo e cosnan corecto y ta haci tur loke nan por haci den nan poder.

Pa loke ta e pregunta tocante cuanto tempo e lo dura pa stabilisa e situacion, basa riba nan experiencia, loke nan ta mira aworaki y teniendo na cuenta e problema di suministro di ekipo cu tin globalmente.

Curran a indica cu aworaki nan ta bay tin un push grandi pa mantenemento, riba cual ELMAR, el a resalta, ta traha duro riba dje. E suministro di transformer adicional, palo di luz y centro di control, esaki lo tuma luga mas laat den e aña.

El a sigui splica cu ora nan a traha e reserva di ekipo, lo tin un lapso di tempo cortico eynan caminda cu e mantenemento lo atrasa y despues lo cuminsa back despues.

ELMAR NV tin un plan di mantenemento cu nan ta bay implementa, pero manera ya caba a indica den articulonan anterior, e plan di manetemento aki tin su desafionan.

Un di e desafionan ta cu esaki ta un emprendimento grandi pa ELMAR y ta un aumento grandi den e trabao cu e personal di ELMAR ta tuma internamente. Loke e expertonan ta spera cu lo sucede ta a cu lo tin algun desafio cu personal pa e trabao aki, como tambe desafionan cu prioridadnan den competencia cu hendenan importante den ELMAR mientras nan ta maneha operacionnan diario, mientras tambe ta ataca e mantenemento.

Relaciona na esaki, Curran a ricibi e pregunta si debi na esaki, mester reorganisacion completo pa e organisacion por funciona manera mester. E experto di MPR a indica, “Mi ta kere e problema realmente ta cu e ekipo na ELMAR ta traha duro, pero ta traha den un manera cu nan caracterisa como un modo di ‘drecha awo’.”

El a splica cu ELMAR ta repara cosnan constantemente di e miho manera cu nan por pa mantene e red di electricidad keda den funcionamento y confiable. Pero como resultado di esaki, e mantenemento planifica periodico ta cay na banda.

Curran a enfatisa cu e caminda cu nan mester tuma aki ta pa lanta e oficina PMO (Project Management Office) pa asina tin hende dedica na e mantenemento y nan no ta distrai y ta haci e cosnan cu mester ta haci pa e mantenemento. “Mi no ta mira esaki como un fracaso di organisacion. “Mi simplemente ta mira cu nan mester recurso adicional, tanto ekipo como personal, pa logra e iniciativa aki,” el a remarca.

E tema di personal ta un tema cu ya caba director di ELMAR, Anthony Irausquin, a trece dilanti indicando cu un di e desafionan cu e compania tin pa por realisa e trabaonan necesario. Den e contexto aki, reportera di Bon Dia Aruba a puntra con nan ta bay realisa e PMO aki, mirando cu ta bay tin mester di henednan cu ta enfoca solamente riba un trabao y nan tin falta di personal.

Irausquin a splica cu ELMAR a bin ta contrata tecniconan adicional den e ultmo lunanan. Esaki, el a indica, ta tumando luga desde cu a lansa e oficina PMO na februari. Anteriormente ELMAR tabatin e plan di mantenemento di cinco aña, pero mirando e situacion, a acelera e plan di cinco pa tres aña, pa cual nan a busca tecniconan adicional.

El sigui splica cu aworaki nan ta den e di dos fase pa bay reaproba e prome parti y wak unda mas tin mester di persona extra.

E director di ELMAR a remarca cu nan por busca personal extra, pero si no tin e material na e momentonan aki, nan ta esencialmente buscando e tecniconan por nada, pasobra mester train nan. El a indica cu ta bay tin hende suficiente pa yuda cu esaki, tin fondonan suficiente y ELMAR ta cla pa sigui cu e trabaonan.

El a resalta cu e problemanan, manera ya caba indica, ta pa motibo di falta di mantenemento di hopi aña caba cu nan mester aborda na e momentonan aki y e solucion no a yega di un dia pa otro.

Director di Utilities Aruba NV, Anthony Rojer, a agrega bisando cu ELMAR tin apoyo di Utilities como di Gobierno di Aruba y ademas di esaki nan tin e fondo necesario pa haci e mantenemento cu ta pendiente.

El a remarca cu nan ta sigui e recomendacionnan di e expertonan di MPR y den esaki e oficina PMO ta hopi importante pa por cambia e estilo di trabao di un modo di ‘drecha awo’ pa un mantenemento mas profesional. Basa riba esey, el a indica, nan ta papiando di un maneho agresivo pa hala e plan di mantenemento di tres aña pa dos aña.