Pa casi mey anochi entre diaranson y diahuebs, un interupcion den e planta di generacion di coriente di WEB a causa un interupcion di coriente na varios bario, entre nan, Pos Abao, Sero Blanco, Tanki Leendert y bisindario.
Riba nan pagina di Facebook, ELMAR NV a informa clientenan den e areanan aki cu debi na un interupcion den produccion di coriente den planta di WEB a confronta problema den distribucion di coriente den e areanan aki, pa alrededor di 11:37pm. E compania a indica cu tabata pendiente pa WEB reestablece e produccion pa asina cuminsa suministra coriente back. E areanan afecta ta inclui Sero Blanco, Shaba, CMB Oranjestad, Eagle y Bushiri. Pa 12:16am, ELMAR a informa cu tur cliente tabatin servicio di coriente back.
Sinembargo, manera por spera, e interupcion di coriente a causa molester entre e comunidadnan afecta. Riba rednan social, usuarionan di Boegoeroei, Paradera, Pavia, Modanza, Montaña, Mazurca, Cunucu Abao, Sabana Liber, Sero Janchi y Matadera, tur a expresa di tabata afecta pa e suceso.
Ayera mediante un comunicado di prensa, WEB a informa cu e interupcion den e planta di generacion di coriente tabata pa motibo di un cortocircuito den ‘busbar A scheider’, caminda motornan RECIP #9 y #10 a cay afo. Consecuentemente WEB a kita suministro di coriente pa N.V. ELMAR.
Team di WEB a tuma accion mesora na momento di e sucedido pa asina acelera e proceso di recuperacion di suministro. Pa 12:15 AM a recupera suministro di coriente 100% pa N.V. ELMAR y consecuentemente pa e barionan afecta.
Den e comunicado di prensa, a bisa cu WEB ta consciente di e molester cu e interupcion a causa y ta ofrece nos sincero disculpa pa esaki. Internamente lo haci un evaluacion di e daño. Gerencia di WEB ta manda palabra di gradicimento pa tur cu a haci nan maximo esfuerso pa reacciona rapidamente.
