Diabierna marduga, un interupcion di coriente den barionan di Sero Patrishi y Tanki Leendert a causa inconveniencia na ciudadanonan, cu no a duda di expresa nan frustracion riba rednan social. Y mas den mainta, area di Balashi y un parti di Santa Cruz tambe a keda sin coriente.
Tocante causa di e problema na Sero Patrishi y Tanki Leendert, ELMAR NV a bisa riba nan rednan social cu tabata un ekipo di voltahe halto cu a sufri daño den un casita di coriente. A haci trabao di reparacion y a drecha e problema, sinembargo, e frustracion entre e residentenan tabata grandi mirando cu algun a keda hasta ocho ora sin coriente.
Y tocante e causa di e interupcion den distribucion di coriente na Balashi y parti di Santa Cruz, ELMAR NV a informa cu tabata trata di un fayo riba un instalacion di voltahe halto di un tercer partido.
Riba rednan social, usuarionan a keda cuestiona pakico cada rato tin areanan ta keda sin coriente. Ya e siman aki tabatin otro interupcion grandi, dia 26 di september, di cual e causa tabata “un cortocircuito den ‘busbar A scheider’, caminda motornan RECIP #9 y #10 a cay afo. Consecuentemente WEB a kita suministro di coriente pa N.V. ELMAR,” segun WEB a informa.
Y e dia prome, dia 25 di september, interupcion di coriente a afecta area di Oranjestad pa mas di cuater ora. Segun ELMAR a informa, e causa tabata un interupcion di suministro riba un kabel bou tera. Pues por bisa cu e causanan ta varia.
Sinembargo, e hecho cu e interupcionnan di coriente a bira algo asina frecuente, ta pone ciudadanonan cuestiona e maneho y si tin falta di mantencion of planeamento corecto pa asina sigura cu suministro di coriente na Aruba ta keda stabiel y constant.
