Interupcion di coriente a afecta area di Oranjestad pa mas di cuater ora

Diaranson mainta ELMAR N.V. a informa cu nan tabata experenciando un interupcion di coriente cu a afecta area di Socotoro, Madiki y un parti di Oranjestad pa mas di cuater ora.

Pa 7:26 di mainta a traves di nan pagina di Facebook ELMAR N.V. a informa cu nan tabata confrontando un interupcion den e distribucion di coriente den e area menciona. Mesora e tecniconan a yega na e sitio pa atende cu e situacion y averigua kico ta e problema pa soluciona esaki.

Segun e informacion cu nan a brinda e causa tabata un interupcion di suministro riba un kabel bou tera. E tecniconan a logra localisa e area specifico di e storing riba e kabel, a cuminsa e proceso pa isla e problema pa nan por cuminsa e trabounan pa reestablece e suministro di coriente.

Poco prome cu 9or di mainta e trabounan di reparacion a cuminsa, ELMAR N.V. a informa, tabata encera un reemplaso di un instalacion di coriente di voltahe halto den un casita di coriente y e trabou tabatin un duracion di alrededor di cuater pa cinco ora.

E areanan afecta a keda sin coriente henter parti mainta ya cu pa 1or di atardi tecniconan a finalisa cu e trabou y a logra reestablece e servicio di coriente na tur cliente afecta pa e problema aki.

Den e ultimo simannan interupcionnan inespera di coriente a disminui den cantidad. Na comienso di aña pa algun luna e interupcionnan tabata basta halto. Pa motibo di e situacion preocupante cu tabatin e momento ey expertonan di MPR a bin Aruba pa haci un investigacion a asina saca afo kico ta e problemanan cardinal, kico ta prioridad y con por soluciona e problema aki y evita interupcionnan di coriente.

Durante e presentacion di e resultadonan di e investigacion, e expertonan di MPR a resalta cu e fayo di ekipo ta e riesgo mas grandi riesgo cu nan ta mira na e isla pa e interupcionnan y e suministro confiabel di electricidad pa e ciudadanonan.

Nan a remarca cu e realidad ta cu e confiabilidad di e red di electricidad no a deteriora di un dia pa otro y cu lo tuma tempo pa kibra esaki.

A pesar di e cantidad halto di interupcionnan di coriente, expertonan a demostra tambe cu e interupcionnan di coriente debi na fayo di ekipo a baha di 70% añanan prome pa 50% den 2024, cual ta nifica un reduccion di 20%.