Servicio di cloud-computing di Amazon ayera a ser afecta pa un interupcion cu a laga algun website y servicio offline.
Un aviso riba e pagina di status di Amazon Web Services a bisa cu tabata experimentando problemanan cu Kinesis, un servicio cu ta procesa corientenan grandi di data, causando ‘aumento den cantidad di eror’ pa un cantidad di website. E interupcion tambe tabatin impacto riba su habilidad di post update riba e pagina di status.
“Nos ta continua trahando pa recuperacion di e problema afectando e Kinesis Data Streams API den region US-EAST-1”, segun un aviso, cual a post laat atardi ayera. “Tambe nos lo sigui mira un mehoracion den cantidad di eror pa Kinesis y varios servicionan afecta, pero ta spera cu un recuperacion completo lo dura algun ora mas.”
Entre e servicionan cu a reporta problema como resultado di e interupcion tabata e subsidiario di seguridad smart di Amazon, Ring; Roku; fabricante di software Autodesk; compania di prestamo di fintech Affirm; servicio di entrega Shipt di Target; y e website di status di subway (trein subteraneo) opera pa Autoridad di Transporte Metropolitano di ciudad di New York. Propiedadnan di Tribune Publishing, manera e Baltimore Sun y e Chicago Tribune, tambe a reporta eror.
Clientenan mayor di Amazon Web Services, incluyendo Apple, Slack y Netflix, no a parce di ta experimentando ningun problema como resultado di e interupcion.
Esaki ta e prome interupcion afectando hopi cliente desde 2017, tempo cu e mesun region US-EAST-1 a experimenta problema cu a pone algun website offline.
