Despues di un prome dia di actividad di e proyecto di accion boluntario mas grandi di Aruba, CEDE Aruba a anuncia cu ta conseha pa pospone proyectonan. E anuncio a yega algun ora despues di e conferencia di prensa di Gobierno, den cual a confirma e prome dos caso di coronavirus na Aruba.

E carta di CEDE ta lo siguiente:

“Na tur organisacion y boluntario,

Pa medio di e situacion cu Coronavirus, CEDE Aruba y e team di Aruba Doet ta conseha tur organisacion y boluntario pa pospone nan actividad di Aruba Doet. CEDE Aruba no ta haya responsabel pa laga e actividadnan tuma luga na e momento aki. “Cu dolor den nos curason” nos ta duna e conseho aki. Aruba Doet ta un evento pa conecta comunidad, pero e no ta mas importante cu nos salud.

Nos ta enfatisa cu tur proyecto ta wordo posponi, nan no mester wordo cancela. Nos no ta kere cu ta bay tin un fecha nacional atrobe, pero cada organisacion por dicidi ariba un fecha nobo ora e situacion ta trankil. Nos lo informa boso di esaki mas concreto ainda. Si tin organisacion cu proyectonan chikito cu ta haye responsabel pa bay door, nos no ta prohibi esaki. Pero e ta importante pa evita cu gruponan di riesgo pa Coronavirus ta participa.

Importante: CEDE Aruba y e team di Aruba Doet ta pidi cada organisacion pa tuma contacto cu nan boluntarionan via telefon, e-mail, WhatsApp of Facebook, pa informa nan manera debe ser. Nos ta conseha boso pa palabra cu ariba un otro momento, boso lo por tuma contacto cu nan pa organisa e proyecto ainda.

Masha danki pa e comprension!”

Club Kibrahacha 60+

Tambe relaciona cu e casonan recien confirma di coronavirus na Aruba, Club Kibrahacha 60+ a anuncia cu ta cancelando tur actividad te cu proximo aviso.

Mirando cu e club ta encarga su mes cu miembronan di comunidad 60+, kendenan tin riesgo mas halto di complicacion relaciona cu COVID-19, a tuma e decision di cancela tur actividad proximo ‘den cuadro di medidanan pa asina proteha nos grandinan pa cualkier riesgo di coronavirus’, segun Jeffrey Matos, director di e club, a bisa den un comunicado di prensa.

Entre otro, ta cancela actividad programa pa publico pa dia 18 di maart venidero na Museo Arkeologico Nacional Aruba.

Pa mas informacion por tuma contacto na Tel: 582-8159.

Universidad di Aruba

Ademas, Universidad di Aruba tambe a tuma medida pa yuda preveni expansion di coronavirus na nos isla, cuminsando ayera. Segun un studiante di e universidad, a pidi tur facultad pa duna les online mientras ta monitor e situacion.

Proximo siman diabierna lo evalua si lo resumi cu les en persona.