Interpol Aruba ta emiti advertencia urgente pa Arubianonan cu bishita Colombia

A traves di un comunicado di prensa e Oficina Central Nacional di INTERPOL Aruba a informa cu nan a haya nan mes confronta cu casonan alarmante cu trata di residentenan di Aruba cu ta bishita Colombia. Ta trata di casonan serio di secuestro y extorsion den ciudadnan manera Medellín y Bogotá.

E oficina ta indica cu mayoria di biaha e victimanan ta hende homber cu ta reacciona riba anuncionan sexual pa prostitucion of massage erotico cu nan ta ofrece via medionan digital. E victimanan ta haci nan cita sea na cas di e persona cu ta brinda e servicio of den camber di hotel di e victima.

Segun informacion cu e oficina di INTERPOL ta brinda, e victima ta ser droga cu Scopolamina, un substancia sumamente poderoso y peligroso conoci tambe como ‘Devil’s Breath’. Nan ta aplica e droga aki na un manera astuto: sea suplando esaki den forma di polvo fini den cara di e victima; of poniendo esaki riba cuero di e dama. Asina cu e homber bin den contacto intimo cu e dama e ta wordo droga inconscientemente.

E consecuencianan di Scopolamina ta cu e victimanan ta perde boluntad y conocemento, haciendo nan sumamente facil pa manipula. Unabes inconsciente, e delincuente(nan) ta horta placa, carchi di credito, telefon y tur otro pertenencia di balor for di e victima. Hopi biaha, e delincuentenan ta logra haya acceso na datonan sensitivo como por ehempel datonan bancario, potret y mas. Esaki ta posibel pa motibo cu e victima, bou influencia di e substancia, ta duna tur informacion sin opone su mes.

Pa e motibo aki INTERPOL Aruba ta haci un yamada urgente na residentenan Arubiano pa ta extremamente cauteloso ora di reacciona riba e tipo di anuncionan aki como tambe ora di haci citanan cu desconocidonan den exterior.

Medionan Colombiano tambe a reporta ariba e fenomeno aki. Manera ya caba publica den nos pagina di noticia regional dia 4 di maart, na principio di luna maart a sucede un tiramento na Medellin cu a laga dos turista stranhero morto. Segun e portal Semana ta indica, aunke e tiramento ta parce di ta un ahuste di cuentanan, e preocupacion na Medellin pa e morto di stranheronan tin e autoridadnan cu alarmanan cendi, igualmente e Mericanonan cu ta yega na ciudad den buskeda di diversion.

Asesinato, hortamento y secuestro di turistanan na Medellin a bira un preocupacion mundial, Asiaticonan, Europeonan y Mericanonan a cay den man di delincuencia urbano cu ta hunga cu amor y sexo pa caba cu e bidanan di nan victimanan.

Instituto di Medicina Legal aña pasa a ricibi e curpanan di 45 stranhero cu a muri di manera violento den e cayanan di e ciudad di “e primavera eterno.” E biaheronan a ser ataca cu armanan di candela, obhetonan contundente y cuchiu pa ahusta nan cuentanan pendiente of pa horta nan pertenencianan.