Manera nos a trece dilanti siman pasa despues di a puntra minister encarga cu husticia Andin Bikker (POR), gobierno tabata sondea manera pa lanta un instituto di Interpol na Aruba mirando desaroyonan riba nos isla y tambe na isla ruman Corsou. Na mes momento cu introduci esaki lo institui un mando policial pa un periodo temporario mientras ta yena vacatura pa hefe di polis.
Entrante 1 di maart lo institui Interpol Aruba. Asina e mandatario di husticia a anuncia ayera mainta durante un conferencia di prensa di gobierno. Manera nos a publica siman pasa, e mandatario a haya cu e concepto di e instituto aki cu a wordo laga pa gobierno anterior no tabata cuadra cu su vision. El a menciona cu tabata laga mucho hopi responsabilidad cu ta cay bou otro departamentonan pa e departamento nobo, kitando par di tarea di demas departamento den proceso.
E mandatario a ‘haci huiswerk’ por medio di entre otro consulta cu Ministerio Publico y Veiligheidsdienst Aruba (VDA) y Departamento di Recurso Humano pa yega na un conseho riba manera optimal pa lanta e departamento aki cual tabata e deseo di hefe di polis Dolfi Richardson pa lidera.
Mando di polis nobo
Na mes momento cu lo lanta e departamento nobo riba prome di maart, lo bin cu un mando di polis nobo y vacatura pa un hefe di polis. E minister ta premira cu e mando lo ta pa 1 aña. E prome paso a wordo tuma pa e proceso cu tabata canando, segun e mandatario. Interpol Aruba lo ta importante pa sigura nos fronteranan segun sr. Bikker por medio di link cu database di Interpol pa asina determina si personanan cu drenta fronteranan ta considera no desea pa e organisacion di polis rond mundo.
Es mas, lo bin cu diferente ‘iniciativanan innovativo’ digital cual lo inclui e sistema advanced passenger info system pa asina por premira kende ta biniendo den avion direccion Aruba prome cu nan baha di avion. Conhuntamente cu sistema di Interpol y e combersacionnan cu ta andando cu ministerio di husticia na Corsou pa intercambia informacion, lo por percura pa menos persona no desea drenta nos fronteranan.
Tur esaki tumando nota di desaroyonan unda segun e minister ta mirando mas y mas persona cu ta keda riba nos ilegalmente despues di drenta legalmente.
