(CuraçaoChronicle) – Banco Central di Corsou y Sint Maarten (CBCS) na januari di e aña aki a ricibi un advertencia tocante posibel infiltracion di nan sistemanan, un asina-yama atake cibernetico. Cu Interpol a duna un advertencia a bira conoci solamente despues cu e atake cibernetico a tuma luga.
Siman pasa, relatonan den noticieronan di e isla a reporta cu CBCS tabata victima di un atake cibernetico dia 5 di september ultimo. Te awo, tin masha tiki informacion riba e suceso aki. Dia 2 di september atardi, CBCS a ricibi inteligencia cu e red operacional di CBCS por a wordo viola. CBCS inmediatamente a lansa un investigacion completo den cooperacion estrecho cu varios experto local y internacional riba seguridad cibernetico y forensico.
Desde e suceso, CBCS a pone su red operacional offline pa sigura tur data y restaura e integridad di e sistema. CBCS tabata purbando di identifica na ki data a haya acceso.
E investigacion a indica cu e plataforma di sistema di pago no tabata comprometi. Sinembargo, e team di expertonan a implementa medidanan adicional di seguridad.
Ademas di e medidanan tecnico cu a tuma, CBCS a tuma contacto cu e autoridadnan relevante pa lansa un investigacion profundo. Den interes di e investigacion aki, CBCS no a duna informacion mas detaya riba e atake cibernetico ilegal aki.
Awo Interpol ta involucra den e investigacion riba e atake cibernetico, despues cu a bira conoci cu por a leak informacion importante. Ta specula cu e atake cibernetico di e luna aki a ser ehecuta door di hackernan Ruso. Pero segun CBCS, no a descubri ningun informacion importante.
