Riba e red social Facebook, algun dia atras, International Dark-Sky Association-Aruba a publica un reflexion ariba con e proyecto di construccion di Secrets Baby Beach Resort na Sero Colorado ta impacta e ecosistema fragil di Aruba y e problema di contaminacion di luz.
International Dark-Sky Association ta un organisacion internacional cu tin como meta celebra y proteha e shelo nocturno, yena cu strea, cu ta un patrimonio cu ta wordo comparti rond mundo y cu ta beneficia tur ser bibo. Nan proposito ta proteha e anochi for di contaminacion di luz.
“Proporcionando liderazgo, herment- y recursonan necesario pa tur hende, e legisladornan y e industria por reduci contaminacion di luz y promove un iluminacion exterior responsable cu ta bunita, saludable y funcional. Nos lo hiba e tema di contaminacion di luz na diferente comunidad rond mundo cu e obhetivo di crea acceso na informacion ariba e impacto destructivo di iluminacion excesivo y e beneficionan di iluminacion responsable,” e organisacion ta remarca.
International Dark-Sky Association na Aruba a señala den nan publicacion cu a pesar cu e construccion di e proyecto Secrets Baby Beach Resort, cu actualmente ta den construccion na Sero Colorado, sigur lo trece beneficionan economico pa Aruba, no por lubida ariba e potencial impacto cu e por tin ariba e ecosistema fragil di Aruba y e problema di contaminacion di luz.
E organisacion ta indica cu durante e ultimo decada, e ciere di e refineria na San Nicolas a permiti cu e flora y fauna por a recupera y cu e reduccion di contaminacion di luz a haci cu e shelo anochi ta mas briyante. Sinembargo, nan ta enfatisa, cu e proyecto di e hotel nobo den un etapa di construccion avansa, tin un riesgo cu por deshaci e progreso aki si no considera instalacion di iluminacion adecua.
Pa e motibo aki e organisacion ta haci un peticion na Gobierno di Aruba pa considera algun punto importante pa conserva y proteha e ecosistema.
Nan ta pidi pa curasha e desaroyadornan di e proyecto pa usa iluminacion adecua pa e shelo nocturno cu lo minimalisa e lombramento intenso, e traspaso di luz y briyo di shelo. Implementa ordenansanan di iluminacion cu lo preserva e shelo nocturno, cu lo proteha e bida salvahe nocturno y cu lo mantene e caracter unico di e isla.
E organisacion ta pidi tambe pa promove e ecoturismo y desaroyo responsable cu ta balora e recursonan natural di Aruba y cu ta preserva e beyesa di e isla pa futuro generacionnan.
Den e potret por mira un mapa di contaminacion di luz cu ta mustra e ubicacion di e hotel y e posible aumento di contaminacion di luz cu por afecta e habitat natural cerca.
