Parlamentario Chris Dammers (AVP) a laga sa cu e echo cu personal di ANSA ta conta cu un instrumento pa dirigi e trafico aereo ta un logro hopi grandi. E echo cu pa añanan a existi un colaboracion estrecho cu Corsou pa asunto di trafico aereo den nos area y awor Aruba tin su propio sistema di radar, ainda nos no por papia di un independencia total, e ta splica.
Sr. Dammers ta declara na Bon Dia Aruba cu keto bay Aruba ta den e sistema di informacion di vuelo cu reino Hulandes a haya den pasado di e mesun ICEAO (International Civil Aviation Organization), cu a dividi mundo den pida grandi pa facilita e control aereo. E tempo aya Hulanda a haya un area basta grandi cu nan ta yama como flight information region, caminda Corsou ta keda responsabel.
Segun e parlamentario esaki a duna Aruba un flexibilidad miho pa sigui traha den mundo di aviacion a base di colaboracion. Ya cu pa ehempel, mañan nos no tin señal of nan no tin señal, of eventualmente tin cierto discrepancia, un por yuda otro.
Legislacion
Pa loke ta nos legislacion, for di aña pasa a bin cu ahustacion pa drecha e reglanan di aeronautica civil. Nan a tene cuenta cu e aspectonan cu tin di haber cu instrumento di control aereo, segun sr. Dammers. Pero esaki no ta kita cu mester keda up to date, ya cu cada tres aña tin asamblea di ICEAO , caminda nan ta cambia y ahusta nan normanan internacional.
Na 2018 ICEAO (International Civil Aviation Organization) lo bishita Reino Hulandes. E ultimo biaha cu e instancia aki a haci esaki, tabata casi 10 aña pasa. Nan ta bin inspecciona con a bay cu implementacion di nan recomendacionnan, y con nos ta cumpliendo cu e reglanan internacional cu a bin den pasado. E lo bira sigur un aña importante pa reino Hulandes segun sr. Dammers.
Historia di radar
E ta recorda cu el a bin cu un mocion den parlamento cu a haya sosten unanime, unda ta wordo urgi pa gobierno bin cu un radar urgente, ya cu e situacion den nos espacio aereo ta bira critico.
Finalmente decision a cay na aña 2015 cu e radar digital lo bira un realidad. Pero mester a bin cu un otro mocion pa no warda mas añanan largo, y finalmente e radar a keda inaugura siman pasa.
Awor nos por tin e siguransa di un trafico aereo ta mas sigur ya cu e controladonan aereo tin un miho instrumento con pa traha cu ne, segun e parlamentario. E echo cu aworaki nos tin uzo di un radar nos por pone mas avion tras di otro y tambe laga bay mas avion tras di otro.
El a bay den historia caminda e ta haya cu e echo aki tabata uno special pa recorda persona manera Narciso Pietersz kende tabata un motor atras di e necesidad pa Aruba por conta cu un sistema di radar. A wordo traha un rapport basta aña pasa di ICEAO, unda a resalta e necesidad di bin cu un radar, ya cu e controladonan aereo no por mira e avionnan den nos espacio aereo y e comunicacion no tabata adecuado.
Mirando con nos industria turistico a crece caminda cantidad di avion ta frecuenta nos isla, no ta corecto pa e controladonan aereo sigui traha bou e pretexto cu nan mester keda haci calculacion, y visualisa mentalmente unda e avion nan ta berdaderamente, segun sr. Dammers.
E radar nobo aki ta uno cu e ta cualifica como super moderno ya cu e ta un sistema otro, mas digital y cu ta comunica cu satelite. Pues e no ta mas e radar grandi y convencional cu nos a yega di conoce, manera esun cu pa basta aña ta para sin traha riba tereno di aeropuerto. E sistema actual ta mas moderno y mas barata. Mientras cu esun cu a keda para sin traha a bira obsoleto cu no ta wordo uza mas.
