International Baccalareate lo ta hopi positivo pa alumnonan

Durante di e presentacion extenso tocante di “International Baccalauareate” (www.ibo.org), cu ta un programa ofreci mundialmente, a conta cu presencia di directivanan di scol, docentenan, como tambe futuro docentenan y representantenan di Departamento di Enseñansa. Pa ofrece e programa International Baccalaureate ta rekeri acreditacion di e organisacion cu for di aña 1968 ta ofreciendo e programa, y ta  brinda training y guia pa e scolnan cu ta aplica pa ofrece e opcion aki tambe na nan alumnonan.

Minister Michelle Hooyboer-Winklaar a subraya cu si scoge pa introduccion di IB no lo reemplasa e sistema tradicional di enseñansa cu ta existi na Aruba. IB lo keda introduci y ofreci como un alternativa pa mayornan y hobennan cu ta desea un opcion diferente cual ta reconoci tambe mundialmente, el a agrega.

Ann Navas, kende ta docente na Colegio Arubano a expresa despues di e presentacion duna pa Michael Leshner cu e introduccion di IB lo ta hopi positivo pa nan alumnonan. El a haya e sistema, cu tin un enfasis riba lifelong learning, ta algo cu tin di wordo explora. Na di prome luga e scol mester ta dispuesto y e maestronan mester ta dispuesto, como cu e docentenan ta esunnan cu ta carga e proyecto, Navas a comenta.

Adicional di e docentenan y e scolnan, Gobierno ta hunga un rol importante tambe,  unda cu mester tin facilitacion di cooperacion cu suficiente fondo pa e scolnan por introduci IB, segun Navas. “Ban spera cu ta un proyecto cu lo por logra,” Ann Navas a bisa, agregando cu e lo ta un desaroyo “hopi positivo pa nos alumnonan”.

Studiante di e “Docentenopleiding wiskunde” na Universidad dI Aruba, esta Alexander Berkley tambe a sigui e charla cu hopi atencion. Como futuro docente e ta di acuerdo cu mester diversifica e sistema educacional Hulandes y ofrece alternativanan na e studiantenan, y un programa manera IB cu ta profesional y ta wordo ofreci pa un compania cu hopi experiencia den e paisnan Americano y Hulanda por ta un di e alternativanan.

 E sistema aplica pa IB no ta algo completamente desconoci na Aruba, y tin scolnan cu haciendo algo similar caba y e ta bayendo bon, Berkley a comenta. El a bisa di IB cu esaki ta un pakete cu lo por tuma y mag di wordo uza; e no ta obligatorio, e no ta costa nada y ta un “aanwinst” pa uza banda di loke tin “eyfo” caba.