Como lector kerido, mi speransa profundo ta cu e varios vision innovativo y columnanan ta ilustra kico lo por ta posibel den futuro cercano pa nos dushi Isla y su habitantenan. Den e columna aki lo mi tuma tempo pa elabora den manera detaya kico mi meta y motivacion profundo ta pa cu tur loke mi ta skirbi den añanan cu a pasa.

Sufrimento Humano

Desde e prome textonan antiguo y nos mesun experiencia diario, nos por facilmente conclui cu tin masha hopi sufrimento humano rond mundo, pero tambe na Aruba. Riba nivel global, ehempelnan manera pobresa profundo, cu ta tuma forma den hende cu no tin suficiente di come of cu ta wordo explota den tur sorto di manera. Na nivel local, pensa riba topiconan manera malesanan cronico manera un persona cu ta keda handicap despues di un stroke. Ehempelnan di sufrimento profundo tin suficiente. E meta cu mi persona tin ta pa reduci e sufrimento aki cu nos tur ta wak pafo di Aruba y cu nos mes ta experiencia.

Mi persona ta di e pensamento cu tecnologia, si e wordo usa den manera responsabel y strategico por yuda alivia hopi problema cu nos ta enfrentando, den ambos nivel local y tambe global.

Den e siguiente seccionnan mi lo kier ilustra, cu na nivel global tin mas cu suficiente capital disponibel, y cu combinacionnan di Altruismo y ganashi monetario pa inversionistanan siguramente ta presente.

213 triyon US dollar disponibel

Segun un reportahe di investment bank UBS, e top 1.5% di hende mas afluente na mundo tin mas cu 213 Triyon US Dollars den balor. Esaki ta un cantidad sumamente grandi y francamente casi inimaginabel. Dus nos por conclui cu simplemente bisa tin suficiente capital pa inverti den tur sorto di proyectonan beneficioso.

Segun un reportahe grandi di Delloite e companianan cu ta maneha e capital aki ta en berdad bezig y dunando prioridad na e necesidad di no solamente genera ganashi monetario pero tambe haci nos mundo un mihor hogar pa un y tur. Pensa di obhetivonan di energia abundante, cero hamber y e eliminacion di pobresa.

Cua combinacion di inversion por crea e impacto mas grandi?

Nos a conclui cu capital ta disponibel y ya caba ta enfatisando metanan altruistico. Awo e pregunta cardinal ta, den kico nos inverti prome, den cua cantidad, cua combinacion y den cua volgorde. Esaki ta un pregunta sumamente complica y ta varia pa cada pais. Riba un nivel macro-economico y internacional nos por haya hopi inspiracion di reportahenan y calculacionnan sumamente detaya di Nacionnan Uni y e Metanan di Desaroyo Sostenible (SDGs). Ya caba tin herment disponibel pa yuda calcula con SDGs ta interactua cu otro y con inversion den un area por crea spill-overs masivo indirecto den otro areanan.

“Practice What You Preach”

Lastimamente y cu dolor profundo, mi vision pa mehora bida di esnan biba na Aruba a wordo blokia pa mas cu 7 aña, simplemente pasobra mi no ta cay na agrado di gobernantenan. E ta ironico cu mi columnanan somehow a yega te na e nivelnan di mas halto di e sector di invesment banking di Merca y di Silicon Valley. Na e momentonan aki hunto cu e netwerk amplio cu mi persona a acumula, mi ta trahando duro riba e vision di un “Sharp-adjusted Altruistic Innovation Portfolio”, cu ta combina Return-on-Investment halto cu metanan beneficioso pa Humanidad y cu ta tuma den cuenta tur e spill-over complex cu inversion tin riba otro.

E ta mi speransa di mas grandi cu den futuro hopi cercano por trece e vision di innovacion tecnologico, altruismo y capital internacional Aruba, pa asina alivia por lo menos un poco e sufrimento humano na nos Isla.