Interes di e ciudadanonan Venezolano pa adkiri un nacionalidad Colombiano a aumenta. Nan ta probecha nan estadia of residencia na Aruba pa bishita e consulado di Colombia y averigua mas con nan por bira un nacional di e pais ey. Ta trata di e ciudadanonan cu a nace na Venezuela of ta carga e nacionalidad di e pais ey, pero nan mayornan ta di origen Colombiano.

Durante un entrevista cu Bon Dia Aruba, consul di Colombia na Aruba, Mirza Gnecco a referi na diferente topico y muy specialmente na e echo cu durante e ultimo lunanan nan ta mirando un aumento di e tipo di solicitud aki pa adkiri e nacionalidad Colombiano.

E diplomatico ta aclaria cu logicamente den nan consulado no solamente nan ta realisa cualkier tramite di e ciudadanonan Colombiano, sino ciudadanonan di otro pais cu ta solicita visa. Tambe ciudadanonan cu a nace den otro pais y cu nan ta desea di registra nan mes como Colombiano.

Pero ta evidente cu durante e ultimo lunanan nan ta tramita un cantidad di solicitud di ciudadanonan Venezolano. Nan ta yiunan di Colombiano y cu nunca antes nan a yega di tramita nan documento como Colombiano. Awor nan ta desea di formalisa tur loke tin di haber cu nan nacionalidad Colombiano.

E diplomatico Colombiano a laga sa cu e aumento aki no tin di haber solamente cu e solicitud di registro civil, cedula y paspoort, sino tambe di visa pa nan por biaha of residencia na Colombia.

“Nos ta ricibi nan cu hopi cariño y nos ta atende nan cu e mesun amabilidad y diligencia cu tur hende cu ta bin na e consulado aki”, asina consul Gnecco a declara na e matutino aki.

Tramite nacionalidad Colombiano
El a bisa cu e proceso di solicitud di nacionalidad Colombiano ta e mesun tramite cu e consulado di Colombia ta haci pa e yiunan di ciudadano Colombiano cu ta nace na Aruba. Ta asina cu den cuadro di e Constitucion Nacional di Colombia, tur yiu di ciudadano Colombiano tambe ta ciudadano Colombiano di origen. Simplemente esun cu ta biniendo pa haci e tramite aki ta hendenan cu antes no a formalisa e proceso aki y awor nan a dicidi di hacie.

El a cita e articulo 96 di constitucion di Colombia cu ta bisa: ‘Ta nacional Colombiano pa nacemento, e yiunan di tata of mama Colombiano cu a nace den tera stranhero, y despues nan ta bay biba den teritorio Colombiano of registra su mes den un oficina consular di Colombia’.

E ta aclaria cu no necesariamente ambos mayor mester ta Colombiano, pero logicamente un di nan ya sea e tata of e mama, mester ta nacional Colombiano.

Pa inicia e proceso aki nan ta pidi un acta di nacemento cu ta wordo duna den e pais unda e persona mes a nace. E documento aki mester ta traduci na Spaño y debidamente oficialisa (stempel). Igualmente nan ta pidi e documento di nan mayornan, ya cu a lo menos un di nan mester ta un ciudadano nacional di Colombia. Nan mester demostra cu nan mayor ta un nacional Colombiano, entre nan mester trece un certificado di e tipo di sanger. Nan mester bin personalmente na consulado di Colombia pa realisa nan tramite di nacionalidad Colombiano.

Igualmente e diplomatico Colombiano a laga sa cu e constitucion nacional di Colombia ta admiti sin problema e posibilidad cu un ciudadano por tin dobel nacionalidad. Tambe el a bisa cu e consulado no tin autoridad pa exigi niun hende pa renuncia na nan nacionalidad cu e tin. “Esaki no ta para den cuadro legal cu ta regarda nos funcion”, el a bisa.