Dialuna a tene e di dos reunion tecnico bilateral entre Venezuela y islanan ABC (Aruba, Bonaire y Corsou) pa atende cu e reestablecemento di e relacion comercial aki.

Esaki ta despues cu na luna di januari ultimo, gobierno di Venezuela a bin cu un embargo unilateral tanto aereo como maritimo riba e islanan aki di Reino Hulandes. E reunion aki a wordo celebra den Capitolio Nacional na Valencia.

A conta cu presencia di representantenan di e islanan y tambe di e gobierno Bolivariano di Venezuela. E reunion aki a wordo encabesa pa gobernador di estado di Carabobo, Rafael Lacava.

Mientras e delegacion di Aruba a conta cu presencia entre otro di director di departamento di relacion exterior, Edwin Abath y director di Duana, Rederick Croes. Tambe tabata presente Jan Willem Le Grand kende ta encarga cu e seccion di negoshi di embahada di Hulanda na Venezuela.


Acuerdonan bilateral
Sr. Abath a declara na medionan local cu e reunion aki ta masha importante pa estrecha e lasonan comercial. “Nos sa cu ta existi lasonan socioeconomico hopi fuerte y historico tambe entre Venezuela y e islanan. Nos ta kere cu como bisiña nos mester mantene e lasonan aki”, e di.

Den e di dos reunion aki nan a sinta pa identifica e areanan di interes comun pa ‘traha a base di un cadena di confiansa entre e paisnan.’ Esaki ta permiti cu e actividad comercial ta uno efectivo y exitoso.

Un aspecto cu nan a papia riba dje ta e intercambio di proceso entre Aruba y Venezuela. Con Venezuela ta maneha nan proceso di exportacion y tambe kico ta wordo rekeri di parti di Aruba pa mantene e cadena comercial aki. Tambe el a laga sa cu Aruba a actua di biaha fei e prome dia cu Venezuela a denuncia e contrabanda entre otro di oro y otro tipo di material. Sr. Abath a bisa cu na nivel di gobierno, Aruba a bin cu decretonan pa prohibi inmediatamente e tipo di productonan cu Venezuela ta considera como ‘strategico.’


Nan tabata productonan cu a wordo exporta haciendo uzo di nos waf, pero nan no tabata productonan pa Aruba. Pa tal motibo y atendiendo e solicitud di Venezuela a wordo dicidi pa no sigui importa e tipo di productonan mineral aki. Pa loke ta e fluho di Venezolano pa Aruba, sr. Abath a laga sa cu Aruba semper tin su mecanismo di control.

E tipo di mecanismo di control aki no ta diferente na loke ta wordo aplica pa e bishitantenan di Venezuela. E no ta nenga cu ultimo tempo ta existi un entrada di persona na Aruba ‘pa medio di canalnan no oficial.’ Esaki ta un preocupacion cu Aruba tin, ya cu esaki ta afecta e calidad di bida tambe di e personanan cu ta drenta ilegalmente. E no a tribi di duna cifra, sinembargo el a indica cu nan ta miles.

Segun e funcionario no ta existi problema pa ricibi e Venezolanonan na Aruba, pero semper cu nan ta drenta legalmente y cu nan documentonan ta na ordo. “Esey ta importante. Mescos cu Venezuela tambe no lo permiti cu hendenan ta drenta di forma ilegal den nan teritorio nacional”, e di.

El a bisa cu anteriormente no tabata existi of alomenos suficientemente e intercambio di documentonan y seyonan. Tampoco no tabata existi un acercamento formal entre e autoridadnan competente di ambos pais. E ta haya cu e encuentro personal tanto na Venezuela y tambe na Aruba y Corsou, y posteriormente na Bonaire, ta importante pa conoce otro y tambe pa papia entre nan mes.

El a bisa cu Aruba ta depende hopi di abastecemento di berdura, fruta y pisca. Pero apart di esakinan cualkier sorto di producto Venezolano, entre nan material di construccion, aluminio y tur loke Aruba por importa di otro paisnan. Pero considerando cu Venezuela ta un pais cercano na Aruba, e ta un bon opcion pa importa e materialnan aki fei Venezuela.

Segun comunicado di secretaria di comunicacion y informacion di gobernacion di Carabobo, nan gobernador Rafael Lacava a sigura cu Venezuela ta habri su brasanan na e comunidad internacional ‘pasobra e ta un pais cu semper a kere den e bon relacionnan cu nan bisiñanan, aliado y socionan comercial.’ Tambe el a laga sa cu fei su punto di bista, e islanan ABC ta nan porta mas cerca di entrada na Union Europeo.

Den cuadro di expectativa di e reunion aki, Jan-Willen Le Grand, a bisa cu durante e prome reunion nan tabatin intercambio di ideanan. Y awor durante e di dos reunion tecnico nan ta intercambia mas informacion acerca di nan proceduranan comercial.

E funcionario di embahada di Hulanda na Caracas a menciona cu ta interesante con Aruba a inicia bek su actividad comercial cu estado Falcon. Tambe con a wordo facilita realmente e control di e barconan Venezolano cu lo permiti un miho fluho riba tereno comercial. E ta haya cu esaki ta un forma pa logra fortalece nan lasonan bilateral.