Fondo di behes ta perdiendo 2 miyon florin pa aña

Banco di Seguro Social (SVb) ta constata cu durante e ultimo añanan e fondo di behes ta perdiendo 2 miyon florin pa aña. Esaki ta pa motibo cu primanan no ta wordo paga pa e dunado di trabou no tabata cumpli cu nan obligacion pa esey, segun director di SVb, Edwin Jacobs.

E director ta splica cu mescos cu nan tin un intercambio di informacion cu Dimas; tambe nan a logra formalisa e tipo di intercambio di informacion aki cu Servicio di Impuesto di Aruba (SIA). Minister di Finansa Angel Bermudez a firma e acuerdo di intercambio di informacion entre SVb y SIA dia 16 di mei ultimo. Sr. Jacobs ta considera e echo aki como uno “sumamente importante”.

Intercambio di informacion
El a splica cu banda cu SVb ta administra e fondo di malesa, tambe nan ta administra e fondo di pensioen di behes, unda como instancia nan tin un obligacion tambe. E obligacion cu nan tin ta pa wak cu e dunado di trabou y e trahado a cumpli cu nan pago di e pension di behes. “Den esey e intercambio di informacion cu departamento di Impuesto ta bira hopi importante”, el a bisa.

Den cuadro di cumplimento di e acuerdo di comparticion di datonan personal ta duna espacio pa SVb por wak si tur e personanan cu nan ta bin hayando pa registra; si nan doñonan di trabou a cumpli of no cu e pagonan di nan primanan di seguro di malesa y accidente y tambe cu e pago di impuesto di  AOV/AWW.

Awor departamento di Impuesto cu ta esun encarga di colecta e pago di e primanan aki por suministra e informacion aki na SVb. Ainda ta prematuro pa bin cu cifra di e companianan cu no ta cumpliendo cu e tipo di obligacion di impuesto aki. “Futuro ta bay bisa esey”, Sr. Jacobs a laga sa.

SIA ta esun cu ta dicidi ki paso nan por tuma den caso cu nan ta constata cu e trahado of e dunado di trabou no a cumpli cu e compromiso aki. SVb ta bay ta presenta un proyecto caminda nan ta bay traha riba e falta di cumplimento di e obligacion fiscal y social aki. E ta den cuadro di husticia social –segun director di SVb- caminda nos tur tin cu carga e peso, specialmente esunnan di e sector laboral oficial y no oficial.

Sr. Jacobs a indica cu door di e intercambio di informacion cu Dimas nan a constata casonan di trahadonan cu durante un periodo e dunado di trabou no a cumpli cu nan obligacionnan di registra e persona y cumpli cu su pagonan.