Intercambio Cultural entre generacionnan ta bay tuma luga dia 19 di october

Diahuebs atardi, Grupo Nucleo a yama un conferencia di prensa pa invita comunidad na un anochi di actividad di Intercambio Cultural Entre Generacion aña 2022 cu lo tuma luga diaranson 19 di october na Cas di Cultura.

Sra. Lena Orman, representante di e Grupo Nucleo durante un entrevista a splica na Bon Dia Aruba cu nan ta bay tin un Intercambio Cultural Entre Generacion di adulto cu hobennan y muchanan cu lo tuma luga na Cas di Cultura e proximo 19 di october for di 6or di atardi te cu 9or di anochi.

For di aña 2015 nan a cuminsa cu e idea aki caminda cu esaki ta nan di 6 edicion mirando cu door di temporada di pandemia no a permiti pa haci esaki durante dos aña “e idea ta cu nos kier pa e chikitonan por siña di e grandinan den baile, canto, arte, y cosnan asina y door di esey nos ta pone tur dos hunto” Orman a señala.

Tur e 12 grupo cu ta participa tin edadnan entre 60,70, 80 aña y ademas tin un grupo di 90+ den cual nan ta bay pone un of dos hoben aden sea nan nieto of bisanieto unda por ehemplo nan ta bay baila canticanan di tempo ora nan tabata mucha y tabata bay scol, otro ta bay presenta nan arte, nan poesia, comedia, “ademas, nos tin un grupo grandi cu ta di Titi Tromp cu tin mas cu 90 aña, e tambe tin su grupo unda su famia ta bin aden”, Orman a señala.

Pa cada grupo nan a pone un limite di 20 participante, aunke ta un intercambio cultural Orman a indica cu te ainda nan no a yega asina leu di participa cu gruponan di otro pais pero si tin hendenan cu ta bin di afo cu a bin Aruba pa wak con esaki ta wordo organisa, el a pone como ehemplo cu un biaha nan a haci un intercambio cultural di Arte di Palabra y un grupo di Corsou a bin Aruba pa wak con esaki tabata y nan a gust’e y nan haci’e na Corsou.

Como representante di Grupo Nucleo, Orman a menciona cu nan ta representa e grupo di grandinan cu tin cu aworaki na Aruba, nan ta entre 30 pa 32 grupo grandi y hopi di nan ta activo na diferente districto, el a bisa cu despues di pandemia nan ta tene reunion cu nan representante por lo menos un bes pa aña pa wak kico e plannan ta pa e aña.

Luna di october ta luna di adulto mayor unda cu tin algun adultonan cu ta participa y ora nan ta caba cu e programa nan ta cuminsa planifica y prepara pa e siguiente aña.

Dia 1 di october tabata e Dia di Adulto Mayor y pa e motibo aki nan tabatin e deseo di haci e actividad aki na Cas di Cultura pero door cu e luga tabatin basta reservacion den dianan ey nan a logra planifica esaki den Cas di Cultura pa diaranson di otro siman.

E 12 grupo cu ta bay participa ta lo siguiente: Grupo Tiki Tin di Noord, Grupo Honey Bees di Santa Cruz, Grupo Lely di Brazil, Curason di Savaneta, Fio Wester y su folklore, Titi Tromp y su grupo, Grupo di Damas Pegasaya, Grupo Happy Hearts, Grupo Flor di Aloe, Grupo Curason Jong, Grupo Bubali 60+ y Rosea Cultural.

Nan tur hunto ta bay participa y ta bay demostra den nan show nan ideanan y creatividad den nan paña cu por ta tipico, den baila, of poesia unda ademas Orman tambe a bisa cu tin cuatro grupo cu pa prome biaha ta bay participa den actividad aki.