Banco di Seguro Social (SVb) pe medio di un comunicado a duna un aclaracion riba e escogencia di e edificio Arulex, pa nan servicio temporal. Despues di reaccion negativo den pueblo, prome minister Evelyn Wever-Croes (MEP) a duna ordo pa cancela e mudamento aki.

Segun e portal NoticiaCla.com, minister encarga cu salubridad publico, Dangui Oduber (MEP), a confirma na nan cu el a ricibi instruccion pa para e deal. E portal ta bisa tambe cu prome minister a declara na nan cu pa evita cualke indicacion di faboritismo, a duna dicho instruccion. E conmocion aki lo a inicia despues cu gobierno a declara di no tin placa pa traha un edificio di MFA na San Nicolas.

Bon Dia Aruba a tuma nota cu opositornan politico, igual hendenan clave cu ta sostene e partido mas grandi den oposicion, esta AVP, no a basila pa start cuestionamento di con por ta posibel cu si tin placa pa huur na Arulex Building pero no pa traha un MFA na San Nicolas.

Motibo pa muda SVb
SVb a constata cu ultimo dianan a surgi un discusion publico encuanto un decision tuma pa SVb, ta pa es motibo nan a duna un conferencia pa asina duna un declaracion riba e proceso, esaki cu e meta di salvaguardia e integridad di e SVb, segun e comunicado cu nan a manda pa Bon Dia.

Desde dia 1 di juli 2007, SVb a tuma tareanan pa control medico pa e sector publico for di BGD. E tempo ey a acorda cu gobierno, cu mientras cu SVb no ta dispone di un espacio adecua, lo sigui duna servicio for di e edificio di Van Leeuwenhoekstraat. Ademas, SVb a haya un parti di e edificio disponibel, pa asina ubica departamentonan cu na e momento ey tabata acomoda den un trailer na Eagle.

Durante e añanan cu SVb tabata ocupa e edificio aki, a constata cu e edificio tabata deteriorando. Consciente di e situacion di e edificio na Van Leeuwenhoekstraat y consciente di e situacion di departamentonan acomoda temporalmente pa mas di 20 aña caba den trailer na Eagle, SVb a dicidi na 2016 cu lo bay construi un hala nobo patras di e edificio na Eagle.

Den e hala nobo aki lo acomoda e departamentonan cu ta den e trailernan, ademas lo muda e departamentonan na Van Leeuwenhoekstraat pa Eagle. SVb ta den e proceso di realisacion di e plannan aki. E diseño ta cla y e mapanan tecnico ta kedando cla. Pa por realisa e construccion aki, SVb a dicidi di cumpra un fraña di tereno di gobierno. Na e momentonan aki e traspaso ta na notario, e comunicado ta sigui bisa.

E situacion di e edificio na Van Leeuwenhoekstraat no a coopera y a sigui deteriora. Asina dia 19 di februari a constata, cu pidanan grandi di e structura di e edificio a cuminsa bin abao. Despues di un evaluacion, dia 20 di februari a tuma e decision cu no ta permiti ningun actividad mas den e edificio. Confronta cu e situacion aki, SVb a cuminsa mesun dia cu buskeda di un espacio adecua pa por sigui brinda su servicionan.

E espacio cu SVb ta busca no ta puramente pa oficina. “E espacio cu nos ta busca mester cumpli cu exigencianan specifico pa SVb. Entre otro e espacio mester ta adecua pa fungi como sala di espera pa un minimo di 40 persona, mester tin un camber di consulta amplio pa nos dokter di control, bañonan publico separa di bañonan di empleado, acceso pa clientenan den rolstoel, suficiente luga di parkeer y oficinanan cu acceso directo di luz di pafo.”

Esaki nan ta e criterianan cu SVb a mantene y lo sigui mantene den buskeda di espacio adecua. Ora SVb a cuminsa busca espacio dia 20 di februari, esaki tabata bao un presion enorme. Tanto e clientenan y empleadonan tabata sumamente preocupa pa nan salud. Tur dia tabata puntra ki dia ta sali pa motibo di e sentimento di insiguridad. Un sentimento cu gerencia tabata desea di atende mas rapido posibel. Si na inicio a pensa cu lo tabata facil pa haya un espacio adecua, mientras e dianan tabata pasa no tabata hayando e loke ta necesario pa SVb.

Pa resumi e proceso cu a wordo haci pa haya un edificio adecua ta cu a bishita y a inspecciona14 espacio na diferente parti di playa. Aki por menciona di Wayaca te na Eagle y bisindario. E espacionan no tabata cumpli cu e necesidadnan y prioridadnan di SVb cualnan ta entre otro un wachtkamer pa minimal 40 persona, baño publico, bon ventilacion y luz. E unico espacio cu a cumpli cu e rekisitonan aki ta e ultimo edificio cu a evalua cu ta Arulex Building.

E decision pa acepta e edificio di Arulex, pa acomoda temporalmente te ora SVb su hala nobo na Eagle keda cla, tabata un decision di gerencia di SVb, saliendo exclusivamente di e interesnan di SVb, manera a formula den e exigencianan. Y decision aki tabata un decision exclusivamente di SVb, sin consulta politico. A cana un proceso caminda a evalua e opcionnan basa riba criterianan saliendo di servicionan di SVb, e comunicado ta finalisa.