Intencion di hinca impuesto di vehiculo den gasolin; Ministro den comentario riba Facebook

Durante fin di siman ministro encarga cu Finanzas, Asunto Economico y Cultura, den un comentario riba su cuenta riba Facebook, a referi na e intencion di hinca e actual impuesto riba vehiculo den prijs di combustible. Den esaki el a menciona e suma di por lo menos 26 cent pa litro. Esey ta e decision cu mester tuma, segun e mandatario.

E asunto a surgi a causa di un comentario den Editorial di Bon Dia Aruba, unda a expresa malcontento cu continuacion di cobranza di belasting via emision di plachi di number tur aña, cu ta un molester grandi pa e ciudadano cu mester para den rij pa oranan largo, mientras tin otro manera pa cobra esaki y cu por stop di saca number nobo tur aña. Recientemente Raad van Advies a yega na e mesun conseho aki tambe den nan conseho na gobierno, di cual Bon Dia Aruba a duna extenso cobertura.

E opcion pa hinca wegenbelasting den e prijs di combustible no ta nobo, durante gobierno antrior tambe e tema aki a bin dilanti. Finalmente a opta pa no hacie. Bon Dia Aruba a haci algun investigacion den loke ta gasta anualmente na combustible y kico ta paga na wegenbelasting. Pa 2020 gobierno tin proyecta pa cobra Afl. 23 miyon na impuesto riba vehiculo. Tumando e ehemplo di un vehiculo cu ta usa 100 liter di gasolin pa luna, den un aña e ta paga Afl. 312,- via compra di gasolin. Esaki ta mas o menos e suma cu un vehiculo particular ta paga actualmente na impuesto. Sin embargo, dependiendo di distancia cubri y consumo particular di un vehiculo, esaki ta varia. Si e consumo di un cierto auto ta 10km pa litro, e ta yega pa cubri 1.000 km pa luna, 12.000 km pa aña. Na 20.000 km pa aña, no asina excepcional riba e isla aki, unda mayoria no ta haci uso di transporte publico, e pago ta bay caba den direccion di mas di 500 florin pa aña. E mandatario no a duna un fecha pa introduccion di e medida aki.

Pa ta completo den loke e ministro a trece dilanti, aki ta sigui e texto completo di e comentario riba Facebook:

“Den e editorial di BonDia Aruba mi a topa cu e pasahe aki, ‘igualmente e numbernan di auto cu ta keda asina djis pasobra tin hende liga na e partido corecto cu ta gana placa cu e cos aki?,’ mi ta puntra mi mes, ta cu ki intencion ta haci e pregunta aki? Te cu mi sa un compania Arubano ta traha plaatchi di number y ela traha cu tur Gobierno. Ma lagando e insinuacion politico ey un banda. E motibo pakiko ainda no a bay over na un plaatchi fiho ta cu e suma cu e belasting ta produci lo mester bay den e prijs di combustibel y esaki lo significa cu e prijs lo mester subi cu por lo menos 26 cent. Ta esey ta e decicion politico cu tin cu wordo tuma. No ta ken ta haya e plaatchi di number ta e decicion politico, pasobra esey ta bay via regla di destaho. Na mi opinion, den e era aki di integridad, tipo di pregunta asina djies pa desprestigia no ta algo integro pa haci. #MinFEC ”

Nota di redaccion:

E motibo pakico nos Editorial a menciona e asunto aki ta pa expresa e disgusto cu cada aña e ciudadano mester pasa aden, no pa paga belasting, pasobra con cu ta nos mester paga esey, pero e falta di respet pa e ciudadano cu ta someti na e practicanan aki di cambia plachi tur aña, cu facilmente por organisa di otro manera, pero ta keda insisti den molestia e ciudadano cu mester keda practica e deporte nacional di para den rij. Ademas e locura y desperdicio anualmente di diezmiles di plachi di aluminio. Como cu nos tin, segun nan propio plan, un gobierno cu ta abraza innovacion y economia sostenible, mester cuminza tuma e aspectonan aki na cuenta. Nos ta tuma como bon noticia cu ta trahando riba e asunto aki.