(AP)—Merca ta “sigur” cu gruponan militante Palestina a uza e hospital mas grandi na Gaza pa tene “al menos algun” rehen captura durante nan atake fatal dia 7 di october 2023, y pa warda infrastructura di comando, segun un evaluacion di inteligencia Mericano a declasifica diamars y un oficial Mericano a descubri.
E evaluacion ta ofrece e apoyo Mericano mas firme pa declaracionnan Israeli tocante e complex di hospital al-Shifa, cual a ser asalta pa forsanan Israeli na november den un operacion denuncia pa organisacionnan humanitaria y algun miembronan di e partido di Joe Biden. Pero e informacion publica no ta apoya completamente algun di e acusacionnan mas significante di Israel cu e hospital a sirbi como un centro pa actividadnan pa Hamas y e Jihad Islamico Palestina (PIJ). E oficial Mericano a comparti e evaluacion riba e condicion di anonimidad.
“E U.S. Intelligence Community ta sigur den su huicio riba e topico aki y tin informacion verifica independientemente riba e uzo di e hospital pa Hamas y PIJ pa un variedad di propositonan relata na su campaña contra Israel,” manera e evaluacion ta declara. E ta sigui bisa cu e ta kere e gruponan “a uza e complex di e hospital al-Shifa y sitionan bao di dje pa warda infrastructura di comando, eherce cierto actividadnan di comando y control, warda arma y tene al menos algun rehen.”
Merca ta kere cu miembronan di Hamas a evacua prome cu Israel a asalta e complex dia 15 di november y cu nan a destrui documentonan sensitivo y electronico prome cu tropanan Israeli a drenta e facilidad. Oficialnan Mericano a subraya anteriormente na inteligencia clasifica, obteni independientemente for di Israelinan, pa ofrece apoya pa e asalto di Israel.
“Mi por confirma pa bo cu nos tin informacion cu Hamas y e PIJ a uza algun hospital na Gaza, incluyendo al-Shifa, y tunnelnan bao di nan pa sconde y apoya nan operacionnan militar y pa tene rehen,” segun vocero di e National Security Council, John Kirby, a contra reporteronan un dia prome cu Israel a drenta e hospital.
E hospitalnan di Gaza a hunga un rol central den e narativonan rondonando e guera den cual e Ministerio di salud encarga pa Hamas a constata cu 22,100 hende a muri—aunke e no ta diferencia entre civil y combatantenan. Hospitalnan ta haya status di proteccion special bao leynan internacional di guera. Pero nan por perde status si nan ser uza pa propositonan militar.
Prome cu e asalto riba e hospital, e ehercito Israeli a revela un modelo 3D detaya di e hospital mustrando un serie di instalacion bao tera, cual el a bisa tabata parti di un centro di Hamas bao di e facilidad di cuido mas grandi den e teritorio. E ehercito Israeli ainda no a revela ningun infrastructura cu tabata asina desaroya como e supuesto centro.
