(AP) – Cientificonan y lidernan den e industria di tecnologia, incluyendo ehecutivonan di nivel halto na Microsoft y Google a publicau n advertencia nobo diamars tocante e peligernan cu inteligencia artificial ta posee pa humanidad.

“Mitiga e riesgo di extincion di inteligencia artificial mester ta un prioridad global anda di otro riesgonan na nivel di sociedad manera pandemianan y gueranan nuclear,’ e advertencia a declara. Sam Altman, CEO di OpenAI y Geoffrey Hinton, cientifico di computer conoci como e padu di inteligencia artificial ta forma parti di e lidernan cu a firma e declaracion cu a ser publica riba e website di Center for AI Safety.

Preocupacionnan tocante sistemanan di inteligencia artificial siendo mas sabi cu ser humano a empeora cu e aumento di un generacion nobo di chatbot sumamente capaz manera ChatGPT. El a manda varios pais mundialmente ta core pa crea regulacionnan pa e desaroyo di tecnologia, cu e Union Europeo tambe ta crea regulacion cu ta premira pa aproba mas fin di e aña aki.

E advertencia recien tabata deliberadamente mas cortico, solamente un frase largo. Esaki ta cu e intencion di inclui un grupo amplio di cientifico cu posiblemente no ta di acuerdo cu tur e peligernan mas probabel ni tampoco e miho maneranan pa evita nan. E esfuerso aki a keda organisa pa Center for AI Safety, un organisacion basa na San Francisco y su director ehecutivo Dan Hendrycks.

“Tin un variedad di persona di tur universidad top den varios diferente veld cu ta preocupa pa esaki y ta pensa cu e ta un prioridad global,” Hendrycks a declara. “Nos mester a motiva hende pa sali for di nan huki y papia tocante e problema aki ampliamente cu tur hende na luga di entre nan.”

Mas di 1,000 investigador y expertonan den tecnologia incluyendo Elon Musk a firma un carta hopi mas largo anteriormente e aña aki unda a haci un yamado pa pone un pausa di 6 luna riba e desaroyo di inteligencia artificial, bisando cu e ta posee “un riesgo profundo na sociedad y humanidad.” E carta tabata un respuesta na OpenAI su lansamento di un modelo nobo GPT-4, sinembargo e lidernan di OpenAI, su partner Microsoft y rival Google no a firma y a rechasa e yamado pa un pausa boluntario den e industria.

Marcando un contraste, e declaracion mas recien a ser promovi pa Microsoft su hefe di tecnologia y oficialnan di ciencia, ademas di Demis Hassabis ken ta CEO di Google su laboratorio di investigacion di AI DeepMind conhuntamente cu 2 ehecutivo di Google cu ta lidera su esfuersonan di politica pa cu AI. E declaracion no ta propone solucionnan specifico pero algun di nan, manera Altman, a propone un regulador internacional di manera similar na Nacionnan Uni su agencia nuclear.

Algun critico a keha cu e advertencianan fuerte tocante riesgonan existencial di creadornan di inteligencia artificial a contribui na promove e capacidadnan di nan producto y a distrae hende for di e yamado na regulacion inmediato.

Hendrycks a comenta cu no tin ningun motibo dicon sociedad no por maneha “dañonan andando y urgente” di productonan cu ta genera imagen of texto nobo, mientras tambe cuminsa adresa e “potencial di catastrofe cu ta den bista.”