Prome Minister Evelyn Wever Croes ta demisionario awe, mescos cu su Gabinete. Ayera e lider di Gobierno di Aruba a informa Gobernador cu e ta disolve Parlamento di Aruba pa motibo di desconfianza den partido POR.
Motibo ta cu Ministerio Publico a publica ayera cu a inicia un investigacion riba keho di malversacion riba cuentanan di fraccion di POR den Parlamento di Aruba. “Pa nos di Gabinete Wever Croes, integridad ta un punto hopi importante. Nos a pone esaki central den nos agenda di gobernacion y un violacion di e indole aki ta considera sumamente serio. Despues di e anuncio di Ministerio Publico, Gobierno a consulta riba kico ta e miho reaccion pa tuma riba violacion di integridad, y a considera e peso di tal indole cu mester tuma e conclusion politico mas extremo, cu ta di disolve Parlamento. Asina a entrega retiro di Ministernan y a disolve Parlamento.
Como Gobierno demisionario, Gabinete Wever Croes lo atende solamente coriente, te ora cu forma un Gobierno nobo despues di eleccion. E maneho di e crisis di corona ta un di e asuntonan coriente. “No a fiha un fecha di eleccion ainda, pero ta delineando esaki si.” (red. Bon Dia Aruba a compronde cu fecha di eleccion ta pa 25 di Juni proximo)
“Integridad no ta un palabra so pa nos. Integridad ta un forma di ta, di actua, hasta ora ningun hende ta mira. Y awe ta un dia hopi dificil, particularmente pa colega Minister di Husticia (Andin Bikker),” Evelyn Wever Croes a bisa. “Nos ta considera cu cualkier Parlamentario cu ta considera sospechoso, mester tuma su retiro. Nos a expresa esaki na mas cu un ocasion. Den e caso aki ta trata di un Vice Presidente di Parlamento. E mas facil lo tabata pa lijm, pero no di e forma aki.”
Riba e pregunta pakico no a pidi Alan Howell pa entrega su retiro, y di forma abrupto ta disolve Parlamento, Wever Croes a bisa cu pa “integridad no ta actua abrupto. Esaki ta un violacion di indole hopi serio. Aki ta papia di un Parlamentario y Vice Presidente di Parlamento. Berdad mester duna espacio pa investigacion, pero Ministerio Publico lo no publica algo asina sin motibo.”
Pa Evelyn Wever Croes, e hecho cu Ministerio Publico ta considera un hende sospechoso, anto tin motibo specifico. Esaki ta pa prome biaha cu el a sosode den Gabinete Wever Croes. Den caso di Otmar Oduber, e investigacion penal a bin seis luna despues cu Oduber a sali di Gabinete Wever Croes. Pa loke ta e iregularidadnan cu Marisol Lopez Tromp, ex Minister cu por cierto Gabinete Wever Croes a retira pa motibo di un relacion di trabou imposibel “e nunca por a concretisa su puntonan cu tabatin iregularidad cu a tuma luga. “E tempo ey, Sra. Lopez Tromp no tabata gosa di ningun sosten y e no kier a entrega su retiro. Pero awor, tur Minister a entrega nan retiro. Nan ta situacionnan diferente.”
