Parlamento a aproba e iniciativa di ley presenta pa e lider di fraccion di AVP, sr Marlon Sneek, cu ta regarda screening di Minister y cual tabata un proyecto di ley cu pa algun aña caba ta ser atendi.
“Pa algun tempo caba, e proyecto di ley aki tabata topico di discusion y combersacion durante di varios periodo di gobernacion pero cu awor nos ta logra concretisa den un ley cu ta stipula henter e proceso cu tin cu ser implementa ora c’un persona asumi responsabilidad como Minister.
Un concepto di ley cu pa algun tempo caba practicamente tur hende ta papia di dje y ta practicamente exigi pa un ley asina wordo introduci pero un biaha mas nos por a ripara cu miembronan di oposicion no kier sostene otro ley cu ta sigura pueblo di por conta cu un miho gobernacion.
Ya caba pueblo a tuma nota con miembronan di partido di MEP ta rabia formalmente ora cu bin c’un iniciativa di ley caminda ta sirbi interes di pueblo mas cu tur cos, y e biaha aki atrobe e mentalidad di pensa riba nan mes y no riba pueblo, ta opone na un proceso riba cual nan mes a bin ta hunga nan wega politico absurdo.
Awor cu a presenta un concepto di ley cu por percura pa un miho proceso di screening di cualkier persona cu kier bira Minister, ta presenta cantidad di excuus, ta bin cu expresionnan totalmente for di sla, sabiendo bon bon, cu nan mes no kier pa un ley asina wordo introduci.
Nos por a scucha lider di fraccion di MEP, Evelyne Wever Croes papia di integridad, papia di politiconan integro, pero na momento cu su persona mes tin cu mustra cu e ta integro, e ta laga hopi di desea.
Ta tristo pa tuma nota cu e lider di MEP kier papia di esaki, mientras cu su actonan no ta cuadra cu loke e ta papia y aki mi tin cu mustra cu pa motibo cu Aruparkin no ta pone klem pa auto, y no ta tou auto bay cu esakinan, Evelyne a dicidi di staciona su auto aki dilanti sin paga e mesun florin cu pueblo sin ta paga tur dia pa staciona nan auto.
Esey tambe ta muestra di honestidad y integridad pero e lider di MEP ta bin hunga su weganan politico den Parlamento, mientras cu riba su auto personal di Aruparking tin cu mustra su persona cu e no ta honesto cu pueblo.
Tambe por a scucha un otro miembro di fraccion di MEP critica e concepto di ley di screening di Minister, bisando cu e no ta completo, pero aki ta trata di un parlamentario di e partido geel aki, cu for di 2005 ta den Parlamento sinta y nunca el a traha riba e ley aki, cu semper nan a uza como argumento den nan atakenan politico.
Mescos cu su lider sr Thijssen a confirma cu e interes politico di e partido aki, no ta dirigi riba interes di pueblo, pero loke ta cumbini politiconan di e partido aki,” lider di fraccion di AVP, Marlon Sneek ta trece dilanti.
