Integridad den recuperacion… Sin mehoracion transparente…?

Segun nos promer ministro e aña aki, recuperacion di nos economia mester bay acompaña pa integridad, o al menos e esfuerzo pa logra esey. A primera vista e por parce un simple lema politico barata, pero nos ta kere cu e ta sincero den su bon intencion. Sin embargo, e intencion di practica integridad no ta suficiente. E no ta ni suficiente pa logra meta di integridad mes, y relaciona esaki cu desaroyo economico ta parce nos mas dificil ainda. Pero, di tur manera loke mester haci ta evalua e acontecimentonan di e aña aki, tanto pa loke ta integridad como desaroyo economico.

Ta berdad cu cierto tipo di falta di integridad por tin efecto negativo riba desaroyo economico. Esey ta por ehemplo e caso ora cierto tipo di corupcion den e aparato gubernamental, eventualmente den colaboracion cu cierto parti di sector priva, ta crea un señal negativo pa inversion, sea di exterior o local. Den e ultimo añanan a detecta diferente tereno, cu tin di haci cu operacion gubernamental, unda corupcion ta un problema constante. No pornada esakinan a resulta den caso hudicial contra tres diferente ministro, cu ta acusa di no a cumpli cu nan huramento como mandatario. Dentro di poco nos por presencia e fenomeno unico, cu nos conoce solamente di otro pais, di tin e ex-mandatarionan aki hunto den prison. Esey no lo ta nada pa festeha, e ta keda un tragedia individual y un berguenza colectivo pa e pais.

Pero, mas importante ta loke ta haci pa preveni e tipo di corupcion aki. Ta bon cu nos por lesa den e mensahe di nos promer mandatario mes cu “ta importante pa tin bon mecanismonan di control pa detecta y coregi e rumbo mesora, como tambe pa investiga y denuncia cu tur transparencia”. Nos ta completamente di acuerdo cu esaki, pero esey ta implica si cu mester bin cambio den e manera cu ta atende e asuntonan aki te awor, y esey nos no a tende di e mandatario, ainda. Ora ta trata di atende caso di corupcion, ta importante pa tin un solo proceso, pa ‘amigo y enemigo’. Si esey no ta asina, anto nos tin un problema grandi di falta di integridad na e nivel mas halto, loke ta mas grave ainda. Y tin caso di den pasado reciente cu, aunke no por deduci ken tabata directamente responsable cu e casonan no a bay bon, ta duna nos di pensa, hustamente riba e manera cu ta handle e casonan. Por ehemplo, dado momento a bira conoci cu cierto personanan den laboratorio di Hospital a comete fraude grandi cu e Paptestnan, cu mester a bay Hulanda y nunca a bay. A cobra si pa e trabao, pa un daño total di casi un miyon florin. Despues di bastante confusion, a bira keto y despues di tempo, a bin resulta cu ‘a laga e pajaritonan bula’ ya cu dos tabata di exterior. Nada di persecucion hudicial, nada… Tampoco nos a tende algo di esfuerzo di AZV pa cobra e placa cu finalmente e organismo aki a paga, y mucho menos un responsabilizacion di esnan cu a acorda e pagonan aki, dentro di e fundacionnan di laboratorio y di Hospital mes. Laga ta un simple cahera na un empresa a horta mil florin, su nomber lo tabata na grandi den publicidad… Claro cu ta anos como comunidad a cubri e miyon cu e dos personanan ey a horta; esnan cu mester a actua mes no ta sinti nada den nan salario…

Otro caso mas reciente tabata esun di fraude y malversacion na Arubahuis. Kico tabata e problema aki? A cuminza diligentemente cu e investigacion di accountant, mester bisa esey, pero despues e caso a tarda masha hopi mes, y cada biaha a haya di tende cu mester carga pacenshi pasobra ta hende serio ta trahando. A bin resulta cu e rapport di CAD tabata cla y entrega casi un (1) aña promer cu a duna cuenta finalmente… Nos a scucha e splicacion di e propio promer mandatario pero nos no ta di acuerdo cu mester a warda tanto pa haci…, kico? Percura pa e persona en cuestion haya un ‘ruta di escape’? Esaki ta bay bira e rutina ‘integro’ nobo, pa tur hende o e ta keda reserva pa esnan cu ta ‘digno di proteccion’ politico? Nos conoce suficiente caso den ultimo trinta y pico aña cu no a haya ruta di escape, hustamente pa consideracion politico, pero ‘al revez’ den nan caso. Y keto bay nos no a haya di tende ta kico ta loke a haci den e casi un aña ey pa mehora e administracion na Arubahuis di tal forma cu no ta haya repiticion. Esaki ta importante tambe pasobra esaki ta loke mester sucede na TUR departamento. Y no bin bisa cu esey no ta posible, pasobra no conoce entidad semi-gubernamental unda horta placa ta practicamente imposible, pa e trayecto fiho y obligatorio den maneho di placa y cu ta requeri aprobacion di diferente persona den e trayecto di pago, di cualkier cos.

Gobierno a co-financia recientemente un investigacion hunto cu Stichting Deugdelijk Bestuur Aruba, e ‘National Integrity System’ (NIS), segun e metodo di Transparency International, di cual gobierno a haya e rapport final aña pasa. Despues no a tende ni un silaba mas di loke ta bay haci cu e conclusionnan, cu tabata hopi duro y negativo. Nos ta bay mira accion proximamente, o ta lema so nos ta haya?