Bon gobernacion, integridad y norma y balor cu comunidad kier mira den un gobernacion bek ta loke ta falta actualmente. Ultimo añanan ta sinti cu tabatin deficiencia pa e aspectonan aki. “Na diferente ocasion mi a mustra cu un di e motibonan cu mi no ta forma parti mas di e partido cu ta den gobierno y tampoco ta carga e responsabilidad di Minister den e gobierno ey, ta netamente pa e aspecto di principio. Ta trata di asuntonan cu mester tin transparencia y claridad pa comunidad. Cierto momento lider di partido y Minister President di Aruba no por a responde na esakinan mas na mi persona.
Cual a pone cu mi a tuma decision pa bay Gobernador na januari unda cu a firma un acuerdo den Conseho di Minister riba 9 punto cu mester a mira cambionan tuma luga. Lamentablemente esaki no a tuma luga. Consecuentemente november decision a cay cu mi a bandona e gobierno cu ta sinta.” Abuso di poder y intimidacion di parti gobierno Tin hopi acusacion tumando luga di e abuso di poder cu ta tumando luga den comunidad, cual ta algo cu nos comunidad kier rechasa y bira lombap’e y cu nos partido ta para p’e. Un politica nobo/diferente unda cu no ta lastra hende su nomber manera cu ta tumando luga directamente of indirectamente door di e gobierno. Hopi ta esunnan riba payroll, hopi ta esunnan cu como coordinador di Minister ta wordo uza den e aspecto aki. Awe kier mustra con e nepotismo y politikeria den e gobierno aki ta tumando luga caminda cu (djis e siman aki so) hendenan a wordo pidi pa pone banderanan nan cas y pa kita sticker di entre otro partido POR.
Pa motibo di promesanan di Prome Minister na un meneer di riba 70 aña, cu lo dune permiso pa un persona cu a wordo saca ilegal for di Aruba, cu e lo regla esaki p’e. Mescos cu intimidacionnan cu ta tuma luga na un ambtenaar, caminda cu un minister cu a bishita ta mustra riba e hecho cu si e no ta hunto cu e gobierno lo mira ki consecuencia lo tin contra e persona. Asina tin diferente caso di intimidacion y abuso di poder cu ta tumando luga cu personanan den comunidad, awor cu ta cerca di eleccion.
