Insuficiente sosten pa propuesta di ley pa legalisa matrimonio homosexual

“E propuesta pa haci posibel e matrimonio entre dos persona di mesun sexo no por conta cu suficiente sosten den parlamento”, segun parlamentario pa partido di coalicion MAN, Giselle McWilliam. Esaki ta e motibo pakico e no ta propone e propuesta di ley pa discusion den comite central di parlamento di Corsou.

Presidente di Curaçao Pride, Frank Holtslag ta responde na esaki cu: “Ta un lastima cu Giselle McWilliam ta scoge pa no entrega e ley mas. Eleccion ta na caminda. Anto hende no tin ta tribi mas pa miedo di perde voto. Mi ta contento cu Stephen Walroud lo continua.” Sinembargo, toch Holtslag ta mira progreso na Corsou den aceptacion di comunidad LGBT+. Pa motibo di coronavirus, e actividadnan di e di ocho Pride Week a keda den escala chikito e aña aki.

Dos aña atras, McWilliam y Stephen Walroud di partner di coalicion PAR a tuma e iniciativa pa presenta un ley pa legalisacion di matrimonio homosexual, cual e tempo ey a ser anuncia simbolicamente durante Curaçao Pride Week. Pero awo cu e propuesta ta cla pa consideracion den parlamento, McWilliam ta retirando.

“Nos ta un isla Catolico. Awo nos no ta cla pa tuma e stap aki. Mi ta spera cu den proximo dies aña por tuma e stap aki si tin otro hende den parlamento”, segun McWilliam a splica.

Walroud ta parce di no ta na altura di e decision aki. E kier pa e propuesta di ley bay riba agenda pa consideracion, manera Bon Dia Aruba a reporta anteriormente. “Mi tambe ta na altura cu e propuesta probablemente no lo por conta cu suficiente sosten. Pero esey no ta cambia e hecho cu nos debe comunidad LGBT+ pa purba.”

Walroud ta bisa cu si ta necesario, e mes lo pone e propuesta riba e agenda di parlamento pa asina e proceso por continua. Ya caba el a entrega un peticion na presidente di parlamento. E parlamentario tambe kier pa e proceso legislativo tuma luga prome cu eleccion. “Probablemente nos no lo bay mas leu cu esey. Pero e mester yega na votacion pa asina si parlamento faya di regula esaki su mes, por enforsa esaki.”

Comunidad LGBT+ por inicia procesonan legal pa forsa gobierno resolve esaki. “No door di cambia matrimonio den codigo civil, pero lo meste ofrece otro solucion pa hende por compromete legalmente den bida real. Esey lo ta den forma di un partnership registra”, Walroud a bisa.

McWilliam ta di acuerdo cu su colega Walroud cu tin mas sosten pa un partnership registra na Corsou, pasobra esaki no ta tocante matrimonio, sino pa sigura derechonan igual pa tur.

Potret: Ret Karibense.