Recientemente a tuma luga na Aruba, e reunion anual di e diferente Ombudsmannan di Reino. E paisnan Corsou, Sint Maarten y Hulanda ya caba tin nan Ombudsman, di cual e institutonan aki ta reuni cada aña pa trata e diferente reto, exito y experiencianan, cu cada un di nan tabatin durante aña. Mirando cu pronto Aruba tambe lo tin su Ombudsman, e institutonan aki, a dicidi di reuni e aña aki na Aruba.
Prome Minister Evelyn Wever-Croes a remarca cu esaki sigur tabata di gran beneficio pa Gobierno, pa asina por scucha kico tur ta e retonan cu nan ta encontra na caminda, pa asina Aruba por ta miho prepara na momento di introduci un Ombudsman, segun un comunicado di gobierno.
Durante nan estadia, e institutonan aki tambe a reuni cu un grupo di studiante na Universidad di Aruba, na unda a papia di kico ta e rol, y e posicion di e Ombudsman den e constitucion di cada pais. Pa e studiantenan aki, e topico tabata di gran interes, ya cu nan a haya un miho bista, di con pa atende cu politica, con ta pone presion riba Gobiernonan y con ta implementa decisionnan den corte.
E institutonan a reuni tambe cu Prome Minister, na unda nan a expresa nan satisfaccion pa cu tur e avancenan cu tin, y specialmente, cu pronto Aruba tambe lo tin su propio Ombudsman. Tambe nan a elogia e ley cu Parlamento di Aruba a pasa riba Ombudsman, cu ta un ley hopi progresivo. E ley aki ta duna e Ombudsman e autoridad pa investiga accionnan, no solamente den sector publico, pero tambe di e companianan liga na Gobierno. Por ehempel aki na Aruba, awa y coriente ta wordo genera y distribui pa WEB y ELMAR, Setar ta encarga cu telecomunicacion, ATA ta encarga cu turismo, y AAA ta encarga cu aeropuerto. Den e ley di Ombudsman di Aruba e persona encarga por investiga tambe si bin keho riba e diferente institutonan aki, cual ta un paso mas adelanta cu otro paisnan.
Prome Minister a indica cu e reunion tabata uno hopi positivo y interesante, y pa Aruba tabata esencial pa scucha e diferente retonan cu cada Ombudsman ta encontra durante aña, pa asina Aruba por ta bon prepara. E seleccion pa un Ombudsman ta den man di un comision independiente, consistiendo di Corte di Aruba, Raad van Advies, y Algemene Rekenkamer y ta di spera cu den comienso di aña 2024, nan lo propone un candidato pa Parlamento por aproba pa asina Aruba tambe tin su Ombudsman.
Premier Wever-Croes ta gradici e Ombudsman di Corsou señor Keursly Concincion, e Ombudsman di Sint Maarten señor Gwendolien Mossel, y e Ombudsman Nacional di Hulanda, señor Reinier van Zutphen, pa a selecciona Aruba como e pais anfitrion pa nan reunion di tur aña. Tambe ta gradici nan pa un reunion positivo na unda a comparti varios informacion valioso, cu lo ta di gran beneficio pa gobierno durante e proceso di seleccion pa un Ombudsman.
