Jayburtt J. Dijkhoff ken ta cabesante di Instituto di Calidad na Departamento di Salud Publico (DVG) ayera mainta a trece informacion relevante pa enfermero y psicologo na Aruba pa atende un presentacion diahuebs y diabierna awor aploke ta trata registro di Arubig.

Dijkhoff a splica cu minister demisionario di Salud Publico, Dangui Oduber, a ordena pa e decreto nacional cu ta regula tur enfermero y psicologo na Aruba ser activa mediante un conseho di minister y aworaki ta bayendo camindanan oficial pa su oficialisacion despues di un trayecto di mas cu un aña di preparacion.

Den e proceso aki a papia cu tur organisacion den e veld di salud publico pa asina por yega na e decreto nacional aki.

Esaki ta considera como algo importante pa motibo cu no solamente Aruba ta bay bira e prome isla den caribe cu lo tin full su Arubig activo pero tambe ta bay duna un proteccion special na tur pashent y tur persona cu ta biba na Aruba. Cu na momento cu un persona ta registra, gobierno ta para garante pa e persona aki cu a pasa su screening y por carga e titulo di enfermero of psicologo.

Si un persona no ta haci esey, na momento cu e decreto nacional lo drenta na vigor, e persona ta usando su titulo ilegalmente manera Dijkhoff a sigura.

“P’esey ta importante pa tur profesional tene cuenta cu e cambionan cu ta bay bin y por cumpli cu esakinan tambe,” el a bisa.

E registro no solamente ta pa protege e pueblo sino tambe pa duna un proteccion na e profesional pa por tin e titulo y pa por eherce nan profesion.

Esnan cu ta falta pa e registro na e momentonan aki ta enfermerferonan, specialista den enfermeria, assistent di dokter cu tambe ta reconoci awor den e decreto nacional, psicologo, psicoterapista, psicologo clinico, neuro-psicologo y otro specialistanan conoci na Merca y Canada den e ramo di psicologia, ademas tin ortopedagogo y Klinische Technologie cu ta yuda den e sala di operacion na hospital, enfermeronan cu ta traha den ambulance.

“Na tur e profesion aki ta importante pa nan sa kico ta e rekisitonan cu ta bay bin pa asina nan por registra na tempo y haya nan titulo cu ley ta preescribi,” el a sigura.

Tambe nos a pone den e decreto nacional cu Canada y Merca ta riba e lista pero ademas otro paisnan manera Belgica y Filipinas, pa tin un oferta mas amplio y por yuda e sector aki.

Durante e conferencia aki di diahuebs y diabierna, nan lo splica con pa registra, rekisitonan, diplomanan, entre otro, cu ta rekeri pa por registra y tambe lo splica con e proceso ta hinca den otro, kico por spera y tambe cu un bes cu lo finalisa e proceso aki por haya sa ki tipo di documentacion lo haya for di minister Oduber.

Tambe ta bay papia tocante proceso di verificacion, cu segun Dijkhoff a menciona, esaki ta algo cu nan ta haciendo caba cu e dentistanan den cual nan ta pasa door di un screening di un organisacion na Merca pa tur enfermero y psicologo tambe lo haci un verificacion di nan diploma “pasobra awendia berdad, lamentablemente ta mas facil pa falsifica diploma of pa bisa cu a bay na universidad, mientras cu nunca no a studia esey. Esaki tambe ta bin acerca den e proceso unda lo splica kico e proceso di verificacion aki lo ta.”

Pa haci esey, nan lo tin un persona di e organisacion di Merca cu ta bay ta presente den e conferencia aki pa trece dilanti na e publico presente mas informacion y lo tin oportunidad di haci pregunta tambe.

Ademas, articulo 2 di ley ta indica cu ta obligatorio pa tur psicologo y specialista den cualkier forma di psicologia mester registra pa por haya e titulo y pa por atende cliente, “no ta cuestion cu nos ta haci esaki pa un formalidad, e ta obligatorio y tin consecuencianan pa AZV, pa Inspectie Volksgezondheid Aruba (IVA) y tin consecuencia pa cualkier cliente na Aruba cu si algo a bay robes, e persona ey por hay’e den un situacion fastioso,” Dijkhoff a señala.

 

El a trece dilanti cu si tur cos lo bay bon, na final di aña of na comienso di 2025 e registro lo bira publico, kiermen cu tur persona por drenta den Arubig pa check si e psicologo ta registra y ta trahando legalmente.

Tambe Dijkhoff a bisa cu nan ta trahando estrechamente cu IVA pa na momento cu nan lo bay haci un sondeo y haya e persona aki trahando ilegalmente, esey ta bay ta refleha den un multa of otro tipo di medida contra e persona tambe.

“Tin caminda legal, tin consecuencianan legal pa esnan cu no kier cumpli pa algun motibo, e ora ey esaki ta keda na nan riesgo, si nan kier sigui traha asina sin registra,” el a enfatisa.

Kehonan specificamente ta bay na IVA aunke segun Dijkhoff, tin hopi hende afecta cu tin miedo di papia y entrega un keho “e cantidad di kehonan mes ta abou y no ta refleha mucho e realidad, pero si loke nos ta wak ta un indicacion cu tin un variedad grandi di cosnan cu tapasa eyfo y esey tambe lo cambia cu e registracion aki, pasobra e persona mester cumpli cu e basico pa por registra y traha como psicologo,” el a declara.

Tambe, Dijkhoff a informa cu tin casi 70 dentista registra na Aruba, tocante kaakchirurg tin un solamente y un MKA-arts di Hulanda

E invitacion ta pa mañan diahuebs 26 y diabierna 27 pa tur enfermero y psicologo atende e conferencia aki di Instituto di Calidad na Hyatt Place for di 1or pa 5or di atardi pero esnan interesa mester registra prome a traves di e-mail: kwaliteitsinstituut@dvg.aw