Durante su discurso na Conferencia di Hende Muhe 2020, premier Wever-Croes a reconoce cu Aruba ainda tin caminda pa cana pa cu igualdad di genero y derecho di hende muhe. Relaciona cu esaki, e ta anuncia institucion di un comision nacional pa promove igualdad di genero.

“Respet pa derechonan di hende muhe y igualdad di hende muhe ta un prioridad grandi pa mi. Mi ta orguyoso di por ta e prome ser femino cu a logra bira Prome Minister di Aruba. Mi no a lanta un dia ta soña cu mi kier bira Prome Minister. Di otro banda, ami nunca a sinti cu e hecho di ta hende muhe a limita mi den locual mi tabata kier den bida.

Sinembargo mi ta realisa tambe cu por tin prehuicionan ainda contra e rol di hende muhe, tambe aki na Aruba. Y no tur hende muhe tin e mes un experiencia cu mi. Nos mester ta honesto, no ta tur cos ta manera cu e mester ta na Aruba. Ainda tin discriminacion y abuso contra e hende muhe” Premier a bisa den su discurso diadomingo mainta den e Conferencia di Hende Muhe 2020.

Segun un comunicado di prensa, ta pa e motibo aki el’a institui un comision nacional cu lo encarga su mes pa promove igualdad di genero na Aruba pa garantisa e derechonan igual di hendenan muhe. Lo haci esaki den colaboracion y cu sosten di e Organisacionnan di Nacionnan Uni pa Hende Muhe (UN Women).

E comision ta consisti di representantenan di Gobierno, NGO, academia y sector priva, cu a wordo selecta a base di nan experticio y experiencia, y ta consisti di e siguiente personanan:

  1. Bureau Ministerio di Asuntonan General, Sra. Lisette Geerman-Gomez
  2. Bureau Ministerio Asuntonan Social y Labor /Centro pa Desaroyo di Hende Muhe(CEDEHM), Sra. Miangela Ras
  3. Bureau Central di Estadistica (CBS), Desiree Helder
  4. Departamento di Asuntonan Social (DSZ), Sra. Merl Serrant Gibbs
  5. Departamento di Asunto Economico (DEACI), Sra. Judesca Briceno
  6. Departamento di Asuntonon Exterior (DBB), Sra. Olivia Trimon-Croes
  7. Departamento di Labor y Investigacion (DAO), Sra. Yvonne Lee Perez
  8. Departamento di Labor y Investigacion (DAO), Sra. Gwendy Kock

Sector Priva/Organisacionan

  1. Professional Women’s Network, Sra. Diana Wever-Salcedo
  2. Aruba Bankers Association (ABA), Sra. Sharon Frankel-de Cuba
  3. Aruba Hotel and Tourism Association (AHATA), Sra. Malinda Hassel
  4. Aruba Trade and Industry Association (ATIA), Sra. Michelle de Groot
  5. Fundacion di Hende Muhe den Difficultad (FHMDD), Sra. Magaly Maduro

Academia

  1. Universidad di Aruba (UA), Sra. Clemencia Eugene,
  2. Instituto Pedagogico Aruba (IPA), Sra. Paula Kibbelaar

UN /UN Women Liaison and Chair

  1. Raadadviseur pa Gobierno di Aruba, Sra. Jocelyne Croes cu lo guia e comision.

Wever-Croes, den nomber di Gobierno di Aruba ta desea e comision aki hopi exito.