Ayera 10 di october tabata e Dia Mundial di Salud Mental. Conmemorando e ocasion aki, FADA, Respaldo y Stichting Hunto a uni pa duna un conferencia di prensa tocante e dia aki pa conscientisa y stop stigmatisacion y discriminacion contra esnan cu tin problema di salud mental.

Rubiella Topenberg, ken ta trahado preventivo di Fundacion Anti Droga Aruba (FADA), a expresa cu ayera nan a haci e lansamento di un video unda ta manda un mensahe hopi fuerte dirigi na esnan cu ta pasando den un situacion dificil y cu “nunca bo ta bo so.”

FADA su trabao pa cu salud mental ta traha den area di prevencion, y pa esey nan a haci un video den cual nan a invita diferente artista local pa duna un mensahe na tur esnan cu ta pasando den un mal momento. “Nos sa cu salud mental ta un bataya cu hopi persona ta pasa y bringa cune. E ta un bataya cu tin ora largo, pero ta hopi importante pa bo sa cu den e proceso aki bo no ta bo so y tin diferente stakeholder na Aruba cu ta dispuesto pa brinda ayudo,” Topenberg a señala.

El a afirma cu en general Aruba tin un problema hopi serio pa cu salud mental. Nan no ta papia di un edad specifico sino di tur edad, pa motibo cu den e trabao cu nan ta haci diariamente nan ta mira cu salud mental no tin edad. “E ta cuminsa for di edadnan chikito, cu problemanan familiar mes den cas cu ta crea cu muchanan ta lanta cu diferente trauma y desbalansa pa nan salud mental.”

Pa loke ta trata hoben, nan tin hopi problema cu nan autoestima, loke segun Topenberg a sigura, tin di haci cu e hecho cu no ta papia suficiente di salud mental. “Nos ta mira cu nos hobennan ta hopi riba media social y nan ta biba bao un presion enorme, y e presion aki tambe ta pone cu nan ta crea un desbalansa den nan salud mental. Hopi di nan ta batayando ansiedad, depresion y hopi biaha nan ta biba cu esaki sin sa cu e tin nomber. Esaki ta algo cu nos tin cu para keto na dje y papia mas cu e muchanan over di esaki,” el a bisa.

Si ta papia di adulto, por mira tanto noticia cu ta sali den medionan di comunicacion di hende cu tin un problema serio; y pa e grandinan, soledad ta algo hopi cruel. “P’esey mi ta bisa cu den salud mental no tin un edad, e ta cerca tur hende den tur edad e por presenta y e idea ta pa nos papia mas di dje.”

Di su parti, Dalgis Montalvo, ken ta fungi como director di Stichting Hunto, a expresa cu e dia aki tabata hopi great pa wak con FADA cu ta haci e parti preventivo, Stichting Hunto pa salud mental basico y Respaldo pa salud mental specialisa ta uni, na unda hopi biaha ta papia di desunion of competencia. “Nos ta trahando hunto, e ta un tarea hopi grandi, no solamente na Aruba sino internacionalmente y mi ta kere a yega momento cu nos como instancia mas grandi trahando pa loke ta salud mental na Aruba, cu nos por yega hunto na otro y traha cu otro cu un miho comunicacion. Esey pa nos ta e parti mas importante, y cu ora tin esey por bay na e proximo paso cu por inventarisa kico ta e problematica cu tin na Aruba pa salud mental.”

Stichting Hunto no tin solamente e parti di salud mental sino tambe e parti di adiccion, cu tambe ta forma parti di e tematica di salud mental. Pa nan ta importante pa trece na comunidad, na gobernantenan y esnan trahando den area aki pa compronde y acepta cu adiccion tambe ta forma parti di salud mental, con nan por duna sosten na instancia cu ta trahando den esaki tanto financieramente como den disciplina cu tin mester pa duna un miho ayudo.

Igualmente, Montalvo a sigura cu tin algun servicio cu por bay cuminsa cobra p’e, pero e no a duna mucho detaye di esaki. Pa nan ta importante pa cuminsa conscientisa cu no ta solamente instancianan mester t’ey, sino cu ciudadanonan mester cuida di nan mes. “Mescos cu bo ta paga pa bay un gym of pa un workshop, inverti den bo mes.”

Dr. Hendricus van Gaalen, director di Respaldo, a menciona cu e parti di cuminsa cu esnan mas hoben lo mas pronto posibel ta hopi importante. “No tin salud sin salud mental y esey ta berdad. Si bo tin problema cu bo salud fisico bo por wanta, pero si bo tin problema cu salud mental bo no por wanta y esey ta e berdad riba tur nivel y tur edad.”

Ademas, el a sigura cu stigmatisacion no ta bon debi cu esey ta nifica discrimina. “Si bo ta discrimina e persona ta hala atras, e ta haya miedo, presion y no kier bay na terapia. E ora ey su problemanan ta bira mas grandi. Sstop di stigmatisa otro y stop di discrimina otro, esey ta hopi bon pa salud mental,” Van Gaalen a bisa.

Pandemia di Covid-19 cu tur su problema y efecto di hende cu a muri tabata causa un efecto, pero despues di esey nan ta ripara cu hende ta hayando mas pobresa, mas problema social den comunidad cu ta bin riba esaki, cu ta causa problemanan mental grandi.

“Nos tur ta responsabel pa con nos ta anda cu Aruba, nos ta responsabel pa problemanan compleho, problemanan basico, pero nos tur ta responsabel di con nos ta pone Aruba riba su pia.”

Van Gaalen a sigura cu tur hende mester ta consciente di kico ta pasando y cu mester stop stigmatisa y discrimina otro hende. “Nos tin cu empodera tur hende, nos tin cu inclui tur hende den nos comunidad. Si nos ta discrimina y stigmatisa otro, por ta den futuro abo ta bay haya e problema,” el a finalisa.