Representantenan di varios instancia di cuido medico na Aruba conhuntamente cu minister di Salubridad Publico, Dangui Oduber, ayera mainta a tene un conferencia di prensa pa papia tocante eliminacion di e recorte di 5.5% den salario di trahadonan di cuido medico.

Minister Oduber a señala cu finalmente a yega ora pa stop e recorte di 5.5% y duna esey back na trahadonan den sector di cuido. E recorte tabata un imposicion di Hulanda tempo cu pandemia di Covid-19 a cuminsa na Aruba na aña 2020, como condicion pa ricibi sosten di likides.

Manera ta conoci, Aruba tabata un di e paisnan mas afecta pa e pandemia aki, y asina Aruba pa por a sobrevivi a haci un prestamo na Gobierno di Hulanda di 916 miyon florin, cual a bin cu cierto condicion, cual minister Oduber a sigura cu ta dificil pa cumpli cu nan.

Un di e condicionnan tabata cu mester a haci un recorte riba cuido medico di 60 miyon florin pa aña, algo cu Gobierno di Aruba no tabata di acuerdo cune door cu e isla tabata pasando den momentonan dificil. Despues di e recorte aki, trahadonan den area aki tampoco tabata di acuerdo cu e recorte di 60 miyon florin y esun di 5.5% riba nan salario.

“E no tabata facil pa nos yega na e dia di awe, y na comienso di aña 2023 nos a dirigi un carta na AZV pa informa nan cu e intencion ta pa nos para e recorte di 5.5%, y nos a pidi na AZV pa traha diferente escenario pa asina nos por yega na e decision cu nos yega na dje awe, cu entrante 1 di mei nos ta para e recorte aki.” Oduber a bisa.

Despues cu nan a ricibi e diferente escenario di AZV, a haci un evaluacion pa dicidi kico ta e miho decision cu por tuma teniendo na cuenta cu tambe mester cumpli cu e recorte di 60 miyon florin. E 5.5% aki ta back den salarionan di trahadonan di cuido medico for di dia 1 di juni proximo.

Igualmente, minister Oduber a indica cu na januari di e aña aki nan a reuni cu e presidente nobo di CAft, Lidewijde Ongeringen, ken segun minister Oduber a mustra un apertura den e sentido di mas comprension pa e situacion cu Aruba ta aden, y a aplaudi e hecho cu AZV ta haciendo e reformanan necesario pa maneha gasto. “Nos ta den un situacion cu comunidad no ta asina saludabel y e presion riba gastonan medico ta continuo. Den dies aña di tempo nos poblacion riba 65 aña a aumenta den 10% pa 20%, esaki ta ilustra e presion cu tin riba e fondonan, pa mantene e seguro sostenibel y e paketenan di seguro pa nos aseguradonan.”

Gobierno di Aruba ta preparando un estimacion di e plan multianual

Minister Oduber a indica cu a splica CAft cu Aruba tin un plan pa futuro cu ta demostra con lo maneha e gastonan di cuido. E deseo ta pa para e recorte di 60 miyon florin y bay over na un perspectiva di un plan multianual.

E mandatario a sigui bisa cu gobierno di Aruba ta preparando un estimacion di e plan multianual pa asina fin di luna di juni 2023 comparti esaki cu CAFT. Den esaki Aruba ta bay haci uso di un economista specialisa den cuido cu lo bay yuda cu tur e calculonan necesario.

Ta hopi importante pa e pais mantene e credibilidad cu por paga back

Edwin Jacobs, director di AZV a expresa cu 2 di mei di aña 2020, tres aña pasa, nan tabata forma parti di e comision cu gobierno a instala pa pensa con nan ta bay haci pa atende cu 45.000 trahado cu na e momento ey no tabata trahando, y con nan mester a haci pa mantene nan pan riba mesa.

“E recorte aki di 5.5% no tabata facil, pero danki na cooperacion den e sector nos por a cumpli cu e condicionnan. Y den aña 2020, e aña cu mas AZV tabatin mester di gobierno, nan por a contribui cu casi 100 miyon florin pa cubri gastonan di AZV,” Jacobs a conta.

Tambe el a declara cu ta hopi importante pa e pais mantene e credibilidad cu por paga back e debenan. “Nos tur tin cu duna nos contribucion den esaki, cu e 5.5% sigur institucionnan manera Hospital Dr. Horacio Oduber y ImSan, cu tin 55% di presupuesto di AZV, ta bin un suma basta bon pa nan disposicion. Nos tin full comprension pa e trahadonan tambe cu ta desea un compensacion pa locual nan a perde, pa nan poder di compra, y ta un apelacion tambe pa nos por crea espacio, pa nos por sigui duna cuido cu eficiencia y eficacia pa nos aseguradonan tambe por ricibi algo di e 5.5% akinan,” Jacos a bisa.

“Awor nos por bay hisa e volumen tambe y keda cu e mesun bon calidad di servicio”

Director di Instituto Medico San Nicolas ImSan, Joel Rajnherc a trece dilanti cu tres aña pasa ora e mensahe a bin cu nan a mester a kita 5.5% di nan salario, “niun di nos tabatin un cara feliz y mi ta sigur cu awe tur hende tin un smile. No solamente esnan cu ta duna e cuido pasobra nan ta haya back loke nan tabata falta, pero tambe tur pashent cu sa cu awor nos por bay aumenta e volumen tambe y keda cu e mesun bon calidad di servicio cu nos ta brindando. Esaki ta algo cu ta bay pa henter sector di cuido medico, no solamente nos instancianan cu ta duna cuido, pero tambe e dokternan di cas cu a sufri tremendamente.”

Rajnherc a gradici e relacion cu nan tin cu Gina Maduro, ken ta fungi como presidente di Sindicato di Hospital AVB, pa motibo cu Rajnherc a sigura cu Maduro semper a sostene e idea cu mester zorg pa e instituto den cual e ta traha por sobrevivi. “Pasobra si e organisacion cay, tur hende ta cay y semper nos den bon palabracion a yega na un acuerdo. Awor cu nos ta haya e 5.5% back, mi ta sigur cu nos ta bay sinta na mesa pasobra nos trahado, esnan cu a sufri mas y mester a sigui traha igual 24/7 mester haya un restauracion.”

Diariamente hunto a sigui brinda bon cuido na comunidad

Jacco Vroegop, director di Hospital Dr. Horacio Oduber a destaca cu “mi ta hopi orguyoso cu no obstante e recorte di 5,5% riba nos lumpsum, asina mes diariamente hunto nos a sigui brinda bon cuido na nos comunidad y turistanan. Mi ta realisa cu esaki no semper tabata mesun facil y sigur mirando cu e recorte riba salario pa hopi tabata un reto. Pues mi ta hopi contento cu e ‘weeffout’ aki, despues cu nos mes internamente a resolve e problema aki pa nos empleadonan, awo a coregi esaki pa hospital mes tambe y tur otro instancia medico. El a costa siguramente hopi energia di nos tur y alabes un constante ‘lobbywerk’,” Vroegop a bisa.

Segun Gina Maduro di ABV, “e prijs di exito ta traha duro, tin dedicacion na e trabao cu bo ta eherciendo y e determinacion cu sea nos a gana of perde, nos a aplica e miho di nos mes na e trabao nos dilanti.”

Awo cu HOH desde 1 di mei 2023 financieramente ta bay ricibi 100% di e presupuesto di cuido di AZV, “nos hunto cu ABV ta bay investiga con nos por compensa nos coleganan pa loke ta e inflacion riba nos isla, pero tambe con nos por bay inverti miho ainda den educacion, aparato nobo y tambe inverti den mehora esfera na diferente localidad special pa colega y pashent”, segun hunta di directiva di hospital tambe a splica.