Recientemente a surgi un discusion riba e topico di abuso di mucha relaciona cu un buki cu un psikiatra a skirbi algun tempo pasa. Prensa Hulandes NOS lo bini e siman aki Aruba pa entre otro entrevista Reginald Danies riba esaki, riba su caso y tambe den general e topico di abuso di mucha na Aruba. E ta conta Bon Dia Aruba cu a base di su experiencia, e problemanan no ta na instancianan ora casonan ta pega, e problema ta uno legal.
E siman aki nos a cubri basta topico relaciona cu locual e instancianan social a trece dilanti den cuadro cu abuso y violencia domestico. Bon Dia a yega di haci varios entrevista cu sr. Danies y su caso unda cu semper el a subraya cu e lucha no ta stop tanten cu no cambia ley di castigo pa pedofiel. Pa locual ta e status di su caso: “Nada no a wordo haci”, sr. Danies ta bisa. El a sigui expresa cu: “Nan ta bisa cu ta instancianan ta pega, pero si bo bringa duro cu instancianan, nan ta yuda bo. Pero hendenan na Aruba tin cu compronde cu instancianan no por haci mucho cu ley, nan tin cu traha a base di ley.”
E mayor ta bisa cu tanto bal pusha pa instancianan yuda si nos ta lagando e abusadonan riba caya cu ta sigui daña e muchanan. “Awor m’a tende cu lo traha mas luga pa hinca muchanan cu tin problema. Tanto bal bo hinca e muchanan den un instancia anto e abusado ta sigui bay. Ora bo wak bon, nos ta pega na un ley cu ta pro abuso.” Sr. Danies ta bisa cu instancianan a yud’e te unda cu nan tabata por cu su caso, pero nan no por bay mas leu den ley. “Ami no tin problema cu instancia.”
‘Mester tin caminda pa cana’
Riba rednan social varios hende a comenta cu sr. Danies tabata un di e prome nan cu a bini dilanti y bati alarma den un forma unico. Kisas na un manera cu no tur hende a bay di acuerdo cu spuitmento hasta riba areanan turistico pa hala atencion na turista, el a hala atencion di comunidad di Aruba riba e tema y toch haya basta critica. Tur esaki despues di a bati na tanto porta y reuni cu basta hende sin yega na un solucion. “E ta bin con un caso wordo investiga. Asina hues ta tuma e cos na serio. Aruba tin un sistema cu si un mama of tata haci denuncia, bo tin cu wak si e mama of tata tabata tin problema cu e abusado. Pasobra mayoria biaha por ta falso testimonio tambe.”
 (2)-300x200.jpg)
Sr. Danies ta bisa cu hues no tin distincion entre si ta un famia Tromp, Croes of kico cu ta. E ta lesa locual ta riba papel y ta akinan ta unda nos ta pega segun e ta bisa. “Nos como Arubano sa ken ta ken etc., pero nan eyden no sa nada solamente a base locual wordo investiga. Ban bisa si e berdad a wordo haya via di e mama, nan ta bay wak ken e persona ta pa wak si ta un vengansa of algo.” Sr. Danies ta bisa cu mester tin un caminda pa bo cana anto esaki mester bay legalmente pasobra si no tur cos semper lo keda pega.
‘Aruba a lanta for di soño’
E mayor ta bisa cu awor Aruba ta lantando for di soño anto a cuminsa ataca instancia, mescos cu su persona mes a haci na inicio di su lucha. “Pero ora mi a keda pusha y haya mi ayudo manera mester ta. Pero unda mi mester yega mes, nos no por yega,” e ta bisa. Sr. Danies no ta compronde pa kico mester bin cu mas meldpunt. Na Aruba nos sistema hudicial ta traha cu Voogdijraad so y sr. Danies ta bisa cu el a siña hopi algun tempo atras ora el a sinta personalmente cu fiscal.
“Nan no tin niun ley cu nos ta traha cu Bureau Sostenemi of cu ken, nan ta tende locual Voogdijraad bisa y niun hende mas. P’esey ami ta bisa cu meldpunt no ta bay yuda cu nada, e problema ta mas leu cu loke hopi ta pensa.” Sr. Danies ta enfatisa tambe cu mester laga tur color politico afo y bringa esaki hunto manera Aruba pa por bin cu solucion. “Ban cera cabes y caba cu e cos ki. Pasobra tras di e cos ki tin mas cos cu nos ta pensa cu ta di mucha so. Ora mi a sinta cu fiscal y PG, nan no kier scucha politica. Dicon e por scucha for di mi mes y no di un Lisette Gomes por ehempel? Eynan mi a cuminsa wak cu nos ta bayendo den un direccion hopi leu. Mi sa cu e ta un lucha cu Aruba mester habri su wowo pa Aruba por solucion’e”, sr. Danies ta conclui.
