Instalacion di palonan pa e Multi-Hazard Early Warning System (MHEWS) di Aruba ta andando

Crisis Management Office (CMO) a informa cu e palonan aki ta un componente crucial di e tecnologia avansa cu lo mehora e preparacion di e isla pa desasternan natural, incluyendo inundacion, temblor, horcan y tsunami.

E colocacion strategico di e palonan di MHEWS aki rond Aruba ta representa un paso significativo den e compromiso cu seguridad publico, manera CMO a anuncia. E infrastructura aki lo forma e weso di lomba di un sistema diseña pa salba bida, reduci daño na propiedad y mehora capacidadnan di contesta na calamidad.

Early Warning System (MHEWS) ta un sistema avansa cu por detecta varios tipo di desaster natural manera inundacion, teremoto, horcan, tsunami y ta duna alerta na tempo. Ta crucial pa un pais tin un MHEWS pasobra e ta yuda pa salba bida. Aruba ta un di e prome paisnan den region cu tin un tal sistema y cu ta cumpli cu e rekisito global pa tin un prome cu 2027.

Na juni di aña pasa, a bira conoci e noticia cu Aruba ta financia door di Union Europeo pa haci un “Early Warning System” esaki ta un sistema cu ta analisa por ehemplo, fenomenonan meteorologico, sismatologico y asina por yega na conclusionnan y duna avisonan trempan, nan ta bay duna training y preparacion pa e sistema nobo aki.

Importante ta cu e aviso mester yega tur caminda, cu e avisonan ta den tur idioma posibel, cu por yega te hasta e persona cu ta hike den mondi cu no tin comunicacion, pero e tambe por haya e informacion ey.

Tambe e sistema ta guia y yuda nan con ta cuminsa un proceso di evacuacion y con por tuma medidanan di precaucion, esey ta e sistema di Early Warning System. E meta ta pa tin mas seguridad, scapa bida di hende y minimalisa e dañonan pa asina haya e forsa pa recupera back.

Esfuersonan ta wordo haci pa logra un Aruba mas resiliente contra cualkier calamidad. E cual a logra cu fondonan di Union Europeo, pa esaki bira realidad.

CMO a inscribi na Union Europeo pa e proyecto aki manera a indica, pa haci peticionnan na Union Europeo no ta facil pa motibo cu tin masha hopi burocracia y ta complica, segun a yega di expresa.

E noticia a drenta cu Union Europeo ta financia 1.7 miyon euro pa e proyecto Early Warning System y cu esaki, Aruba ta bira un pionero den Caribe, un role model pa otro paisnan den Caribe, na unda Nacionnan Uni ya a stipula cu dentro di 5 aña tur pais den Caribe mester tin un sistema asina y Aruba ta canando adelanta den esaki.