Organo consultativo (Raad van Advies, RvA) ta contento cu den e acuerdo di gobernacion di e gabinete nobo ta para cu lo considera e instalacion di un corte constitucional, segun e comunicado ricibi di RvA.

RvA ta bisa cu nan a boga varios biaha pa un corte similar y kedando riba e mesun tema. Nan ta spera cu den un termino corto lo haci un esfuerso pa proteha e ciudadano contra actonan incorecto di parti di gobierno pa bin cu un (kinder)ombudsman (defensor publico).

E organo a publica riba 23 di februari su relato di aña 2017. Manera custumber e relato anual no ta contene solamente un bista di e trabounan haci durante e aña, sino tambe un bista critico riba e desaroyonan durante dicho aña.

Presidente di RvA, Frits Goedgedrag, a skirbi den e introduccion cu na 2017 varios acontecimento a conmove e comunidad y a causa un avalancha di atencion pa e tema di integridad y bon gobernacion. “Pa es motibo ta necesario pa establece reglanan relaciona cu integridad di ministernan, financiamento di partido, transparencia den funcionnan secundario di dignatarionan y otorgamento di subsidio. Tambe e instalacion di un camara di integridad cu eventualmente lo aporta na investigacion di infraccionnan contra integridad”, segun e introduccion.

Den su consehonan RvA ta mustra gobierno y parlamento, unda ta necesario y relevante, riba e desaroyonan of situacionnan cu ta menasa calidad di gobernacion. Sinembargo, gobierno no ta obliga pa sigui e consehonan. E papel cu RvA ta hunga ta termina na momento cu no ta sigui e consehonan. Instalacion di un corte constitucional unda interes politico no ta hunga un rol, uzando St. Maarten como ehempel, y cu ta evalua e productonan legislativo pa elementonan en pugna cu ley y e constitucion, por duna resultado.

E tema di e relato anual e biaha aki ta trata (limitacion di) derechonan fundamental. Aña pasa e topico aki a bini dilanti durante varios proyecto di ley. Durante evaluacion, e garantia di e libertadnan fundamental di e ciudadano semper ta e principio primordial di RvA. Manera indica den e tema, RvA ta considera cu ora ta limita derechonan fundamental, mester establece exigencianan halto pa loke ta trata e forma y contenido di esaki. Hunto cu esaki, ta di gran importancia pa evalua si e limitacion concerni tambe ta realmente cubri cu suficiente garantia, e comunicado ta finalisa.