Instalacion di boei den lama

Manera ta conoci, ya pa algun aña ta trahando riba e Beach Policy conhuntamente cu Ministerio di Turismo, DIP, DOW, Departamento Maritimo, A.T.A., KPA y Polis Maritimo. Na e momentonan aki e Beach Policy ta den su fase di implementacion.

E simannan nos dilanti por bay cuminsa wak instalacion nobo di boeinan den nos lama, cu financiamento di A.T.A.. Señora Laura Peñate di Varadero a splica “cu e prome container di e boeinan a yega y ta cuminsa instala esakinan e prome siman di Juli,  ta calcula cu e instalacion di e boeinan lo dura mas o menos un total di 12 siman”.

E instalacion di boeinan lo cuminsa banda di Ritz Carlton y lo yega te cu Tamarijn y lo cubri ful e area di hotelnan cu ta un total di 21 area di lama. Un total di 2500 boei lo wordo instala durante e simannan binidero. E boeinan aki t’ey pa indica e “zona di landamento” cu lo bay ta te cu 75 meter for di canto. Tambe lo tin e boeinan pa indica e “buffer zones” cu lo ta bay ta 75 meter mas afo. 

Nos kier a avisa tur personanan cu ta haci uzo di nos lama cu e instalacion aki ta andando y pa tene esaki na cuenta. E instalacion di e boeinan lo tuma luga di dialuna pa diasabra di 8:00 di mainta te cu 5:00 di atardi. Lo cuminsa cu esaki den e luna di Juli y lo sigui te cu September.

Pa garantisa e siguridad di un y tur, ta urgi tur usuario di lama pa haci uzo solamente di e area destina pa nan. E aspecto di siguridad mes ta un di e metanan principal di e Beach Policy. Cu cumplimento di reglanan y bon cooperacion di un y tur nos lo logra e meta di e Beach Policy, pa ofrece nos pueblo y bishitantenan playanan organisa cu tur por disfruta.