Instagram ta continua su lucha contra termento riba su plataforma, e biaha aki facilitando control di negatividad cu ayudo di algun caracteristica nobo.
Awo lo ta posibel pa elimina gran cantidad di comentario negativo di un solo vez, como tambe block of restringi varios cuenta.
Claro, esaki ta mas util pa esunnan cu cantidad grandi di siguido, kende usualmente ta ricibi miles di comentario riba un solo post. Na luga di mester sinta y elimina cada comentario individualmente, awo nan por elimina tur di nan cu un par di ‘tap’.
Esunnan cu iOS por habilita e caracteristica door di tap un comentario, y despues e icono di tres punto ubica na e skina ariba banda drechi. Eynan, selecta e opcion ‘Manage Comments’ y scoge te hasta 25 comentario pa elimina simultaneamente. Por block cuentanan tur hunto door di tap ‘More Options’.
Usuarionan di Android ya tabatin habilidad di elimina comentarionan en cantidad, pero awo tambe por block of restringi cuentanan door di tap y wanta un comentario, tap e icono di tres punto, y selecta ‘Block’ of ‘Restrict’.
Den otro intento pa combati termento, e compania tambe ta lansando controlnan pa controla ken por tag of menciona bo riba Instagram. Den Settings, por scoge pa duna permiso pa menciona of tag bo den un comentario, descripcion di potret, of Storia pa tur hende, of unicamente hende cu bo ta sigui, of niun persona.
Pa resalta positividad, Instagram pronto lo test ‘Pinned Comments’, den cual usuarionan por selecta un cantidad specifico di nan comentarionan faborito y ‘pin’ esakinan na top di nan comentarionan. Mirando cu tur hende ta pega na nan smartphone durante e pandemia, no tin realmente un miho momento pa enfatisa e importancia di positivismo riba rednan social.
