E departamento nobo di gobierno, esta Inspectie Volksgezondheid Aruba a drenta den funcion oficialmente. E departamento a wordo introduci durante un seminario tocante cuido di salud riba nos isla.
Esaki segun informacion for di un relato di gobierno tocante esaki.
Durante un seminario di dos dia den fin di siman, Minister di Salud Publico, Cuido di nos Grandinan y Deporte, Alex Schwengle a atende un seminario pa cuido di salud riba nos isla. For di aña pasa a anuncia cambionan grandi den nos sistema di salud publico. Cambionan cu lo mester garantisa cuido di salud riba un nivel hopi mas halto y cu enfoke riba calidad y siguridad.
Den e esfera aki a cuminsa organisa y planea pa introduccion di un departamento nobo cu awe ta carga e nomber Inspectie Volksgezondheid Aruba (IVA). Un organo cu ta encarga cu control di calidad y siguridad den nos cuido medico. Pero tambe lo e sirbi como consehero pa Minister di Salud Publico, Ministerio di Salud Publico y e sector completo, o sea, e centro unda tur cos lo mester pasa pa asina yega na e nivel di calidad y siguridad cu tin mira riba dje.
Seminario
“Esaki ta un seminario di dos dia – diasabra y diadomingo – organisa pa Inspectie Volksgezondheid Aruba cu a cuminsa funciona desde dia 1 di januari 2017, unda cu nos tin e tema di calidad y siguridad,” Minister Schwengle ta informa. Durante e seminario a toca temanan di kico ta calidad, con ta bay controla y e parti di siguridad cu lo mester garantisa pashentnan den cuadro di un miho cuido.
“Pa reenforsa nos seminario nos a pidi tambe Inspectie di Sint Maarten (SXM) y Hulanda pa ta presente, specialmente e Inspecteur cu ta haci e islanan BES.” Corsou no tabata presente pasobra cu no a cera un convenio di cooperacion.“Cu Sint Maarten y Hulanda si, pero lamentablemente door di cierto circunstancianan te dia di awe no a logra ainda cu nos isla ruman Corsou. Cu tempo nos ta spera cu lo tin un bon cooperacion cu Corsou tambe”, segun e mandatario.
E temanan cu a enfoca riba dje ta calidad y siguridad y a invita henter e sector di cuido. “Nos a invita, por ehempel Hospital, Imsan, SABA, Wit Gele Kruis, y no solamente esunnan cu ta ehecuta e cuido pero nos a invita ODEA, Asociacion di Specialistanan, e Asociacion di Dokternan di cas, Boticarionan, Directie Volksgezondheid, y te hasta a invita EPI sector di cuido pasobra ta nan ta educa e nursenan, assistentnan di boticario y ta hopi importante pa nan tambe sa e situacion nobo cu ta bay tin awor cu nos a bin cu Inspectie nobo,” asina e Minister ta accentua. E mandatario ta enfoca tambe riba e parti pro activo di Inspeccion y cu no ta bay ta cu solamente ta reacciona ora algo pasa. “Nos ta bay exigi tambe di e sector cu nan mester traha pro activo pa keda monitor nan mesun sistema y siña continuamente pa cada bes saca tur e foutnan cu tin den e sistema pa asina evita cu lo tin problema. Claro kisas e ta bay ta casi imposibel pa bay garantisa un sistema cu ta bay ta sin fout 100%. Pero esey mester ta bo meta si purba di saca tur fout di bo sistema.”
