Ayera Inspectie Volksgezondheid Aruba (IVA) hunto cu Asociacion di Dokternan di Cas (HAVA) y Asociacion di Boticario (VAA)  a ofrece un conferencia di prensa pa informa comunidad tocante e recall di remedinan di presion na unda cu nan a haya notificacion cu algun remedinan mester keda retira  for di mercado (recall) na boticanan na Aruba. 

Roselynn Angela inspector di remedi di IVA a splica cu ora un recall ta tuma luga ta ora cu tin cierto remedinan cu a keda traha cu no ta conforme e calidad di e producto cu e mester ta segun e fabrica, nan ta haci testnan di laboratorio y via di e testnan nan ta wak cu tin cierto productonan cu e concentracion ta di mas den dje.

A base di esaki, un di e importadonan di remedi na Aruba a verifica cu tin batchnan contamina cu a keda importa na Aruba y a tuma e accionnan necesario pa informa e boticanan debidamente.

E batchnan contamina aki ta contene e producto AZBT cu por ta canceroso. Ta importante pa menciona cu e contaminacion aki ta pasa durante e proceso di produccion di remedi y no por keda preveni.

Sinembargo, Angela a menciona cu control riba calidad di remedi ta hopi rigoroso y e limite unda cu ta acepta un contaminacion ta hopi stricto. Pues, a haya un cantidad hopi chikito di e producto AZBT aki. Esaki ta nifica cu e chens cu en berdad por haya cancer door di bebe e remedinan aki (Losartankalium, Valsartan of Irbesartan) cu ta contamina ta 0.000001%, dus practicamente 0%.

“Pa precaucion tin cu saca nan for di mercado”, Angela a sigura.

Esaki ta remedinan cu ta wordo prescribi pa personanan cu ta sufri di presion halto y cu problemanan di curason, na Aruba e remedinan aki ta wordo usa hopi y nan ta obtenibel cu receta di dokternan na botica, segun loke el a indica.

Asina mes, Angela e señala cu e proceso ta cu e fabrica ta manda e importador cu tin e producto registra akinan na Aruba, e ta bisa cu e producto aki mester wordo saca for di mercado na unda nan ta sak’e te nan pashent y pa e motibo ey nan tambe a bin dilanti pa asina informa comunidad e procedura cu tambe nan mester tin cu haci, el a afirma cu e productonan aki tin mas cu un importador, pero di un importador so su remedinan ta wordo recall, loke ta nifica cu tin otro importadornan cu tin e mesun remedi y cu por wordo distribui e pashentnan di Aruba cu e remedinan aki.

Drs. Adrienne Tromp boticario di Botica di Servicio y miembro di directiva di asociacion di boticario (VAA), a confirma cu nan rol como botica ta cu asina cu nan a haya e carta di e importador na Aruba nan mes a cuminsa tuma contacto cu e pashentnan cu ta usa e medicamentonan menciona caba di e marca PCH.

“Nos ta yamando pashentnan pa pidi nan pa bin cu e paki back na botica, pa asina nan ta control’e y tambe nan lo duna un otro alternativo”.

El a indica cu tin boticanan cu a yama tur nan pashent caba y otronan ta bezig cu esey, pa e motibo ey nan ta pidi pa pashentnan cu ta usa e remedinan aki pa controla e charge/lot nummer riba nan paki di remedi pa wak si nan remedi ta den e lista di recall, e charge/lot nummer ta indica e batch di e remedi y por haya na banda riba e paki di remedi, tambe pashent por acerca na Botica pa laga nan controla e paki.

Solamente remedinan cu tin e chargenummer cu ta wordo indica riba e lista di recall, mester entrega back na botica, pues si e chargenummer riba e remedi ta cuadra cu e chargenummer cu tin riba e lista, e pashent mester tuma contacto cu su botica.

Tromp tambe a informa cu nan ta bezig pa duna e otro remedi di alternativa e periodo di un luna si e otro importador aki na Aruba ta pidi pa nan cooperacion pa asina nan por yuda tur e pashent y pronto lo haya un batche mas grandi cu lo por duna e resto di remedinan pa e otro lunanan.

El a bisa cu ta importante pa pashentnan haya sa cu “no mag di stop cu e medicacion y tuma contacto cu dokter” Tromp a expresa.

Juaquin van Tright presidente di e asociacion di dokternan di cas (HAVA), a indica cu nan tambe a wordo informa di recall cu ta surgiendo na Europa y di biaha nan a tuma contacto cu boticanan y IVA na unda e ta conseha cu ora un pashent ta usa di e remedinan aki pa no stop di biaha, vooral cu lo cual nan a haya den remedinan aki ta un cantidad di ‘kankerverwekkende stof’ cu nan ta haci’e di manera preventivo y efectonan secundario ta hopi chikito y cu hende no tin motibo pa drenta den panico sino cu tin cu tuma contacto cu botica of dokter di cas.

E riesgo pa stop di bebe e remedi sin tin un otro remedi cu ta regula e presion ta hopi mas grave cu e risico di contaminacion. Pashentnan cu tin remedi cu no ta cay den e lista di esunnan contamina, no mester haci nada.

E carta di e compania farmaceutico y e lista completo di e recall por haya riba e website di IVA: www.iva.aw ta importante pa tene na cuenta cu no tur remedi cu ta aparece riba e lista a wordo importa na Aruba tambe.