Ayera mainta, Inspectie Volksgezondheid Aruba a ofrece un conferencia di prensa pa medionan local y asina a trece dilanti pa comunidad e topico di intimidacion of abuso sexual door di un dunado di cuido.
Cheryl Rosa-Fingal, Inspecteur Gezondheidzorg, a expresa cu nan ta e departamento cu ta haya hopi keho di pashentnan den transcurso di e añanan cu nan ta existi, y un di e kehonan tin di haci cu e tema aki.
El a splica cu ora un persona ta bay cerca un dunado di cuido ta pa motibo cu e persona aki ta den un situacion hopi vulnerabel, na momento cu por ta e ta sinti su mes malo of kier bay na un dokter. “E ta un confiansa cu e persona ta duna di antemano na un dunado di cuido.” Pero pa e motibo aki tambe, por mira cu ley ta castiga e tipo di violacion manera intimidacion of abuso sexual door di un dunado di cuido hopi mas severo.
Manera el a menciona, e persona ta na un estado vulnerabel y e dunado di cuido ta puntra e persona pa haci cierto examinacion den su curpa of e ta bisando cierto cosnan y door di e confiansa cu e persona mester por tin den un dunado di cuido “e ta bira algo hopi fastioso si e limite aki ta wordo surpasa door di un dunado di cuido”, Rosa-Fingal a bisa.
Asina mes, el a declara cu esaki no ta nifica cu nan ta hayando hopi keho di e tipo aki sino cu tambe por papia di violencia den cuido pero aworaki te hasta un intimidacion por ta un remarca.
Pa hopi biaha por wak cu ta trata di hende muhe pero por trata di hende homber tambe, segun loke Rosa-Fingal a sigura y e motibo pakico nan a trece dilanti e tema aki ta pa conscientisa hende, pa tur hende realisa nan mes cu no ta pasobra cu un dokter ta bezig cu un persona y e por mishi cune.
Conscientisacion ta nifica cu un hende por puntra pa comunicacion y tambe na banda di e dunado di cuido tambe mester haya mas atencion pa nan realisa cu no ta normal den e reglanan di cuido cu por ehempel, un persona por kita su paña dilanti dje.
Esaki ta un tematica basta pisa, manera Rosa-Fingal a comenta y nan tambe kier informa cu e persona mester ta consciente, puntra y papia si no ta sinti su mes confortabel, ademas si tin algun duda por busca ayudo y papia over di e situacion pa haya sa si ta normal of no.
Ademas, e persona por haci un denuncia na Jeugd- en Zedenpolitie na unda nan tin cooperacion hunto cu Inspectie Volksgezondheid y Ministerio Publico pa asina wak si e caso mester bay wordo persigui, nan como Inspectie Volksgezondheid Aruba nan ta sigui monitoria tur e suceso den cuido y ademas di esunnan cu por wordo considera como ‘normal of no’.
El a haci un apelacion pa comunidad por comunica mas y tambe dunado di cuido realisa su mes cu e por comunica mas y papia cu Inspectie Volksgezondheid pa nan por guia e persona den e proceso.
Ta existi caso di personanan cu no tin nan documentonan legalmente pa traha como dunadonan di cuido pero nan ta haci esey di manera ilegal, Rosa-Fingal a trece dilanti cu esaki no ta trata di nan specificamente sino cu nan ta hayando algun casonan cu tin di haber cu e problematica aki
“Mi kier aclaria cu Inspectie no ta hayando hopi keho di esaki, pero si ta pasando” Rosa Fingal a expresa.
Tambe el a afirma cu personanan ta tuma contacto cu Inspectie pa motibo cu nan kier entrega un keho, por ehemplo cu e dunado di cuido a surpasa e limite y den esaki Inspectie ta papia cu e persona y den conexion cu Ministerio Publico nan por bisa e persona pa e por haci un denuncia cerca di Jeugd- en Zedenpolitie.
El a bisa cu den e ley di calidad di cuido den articulo 8 ta papia di violacion den un relacion di cuido, loke ta nifica cu esaki ta hopi serio y cu ta den e ley.
Di mesun manera, e persona tambe por haci un melding na e ora cu no a wordo sinti bon cu un dunado di cuido, e por haci un notificacion na Ministerio Publico y esey por yuda nan cu otro casonan probablemente.
Rosa-Fingal a afirma cu aworaki tin un caso bezig cu un profesional cu ta wordo persigui door di kehonan cu a wordo entrega.
Asina mes, el a indica cu nan ta ripara un problema den cultura Arubiano tambe pa motibo cu personanan riba rednan social ta comenta loke a pasa cu nan pero e mayoria no ta trece esey dilanti pa bisa algo, “e ta algo masha tiki mes cu ta pasa na Aruba pero bo ta ripara cu nan no ta haya e canalnan pa haci nan melding of denuncia sino cu nan ta haci’e via Facebook”, el a declara.
Por a mira tambe cu cultura di mishimento of tiramento di palabra ta birando normal na Aruba segun loke el a menciona, pero e tambe a enfatisa cu un dunado di cuido tin su professioneel opleiding, e sa ki ta su limitenan y e tin e deber pa informa of comunica cu e pashent pa bisa si algo ta normal of no y como persona sea hende homber of hende muhe e persona mes mester sa si tin algo straño.
